Maryłuize Biek: Chutki rasstreł prychavaŭ sapraŭdnyja matyvy złačynstva
19.03.2012 / 09:43
«Chutkaje źniščeńnie dokazaŭ paśla zakančeńnia pracesu i chutkaje pryviadzieńnie ŭ vykanańnie pryhavoru ŭ dačynieńni da Dźmitryja Kanavałava i Uładzisłava Kavalova, niahledziačy na mižnarodnyja pratesty, zaklikany prychavać sapraŭdnyja matyvy»,— takuju zajavu zrabiła 18 sakavika Maryłuize Biek, deputat bundestaha ad partyi «Sajuz 90/Zialonyja».
Parłamientaryj ukazvaje «na daminavańnie dziaržaŭnaj rytoryki ŭ kamientaryjach pa pracesie». Ihnarujecca toj fakt, što rasśledavańnie pryčyn vybuchu ŭ mietro nie adpaviadała pravavym normam.
Hiermanski deputat nazvała sumniŭnymi akaličnaści, pry jakich maładyja ludzi byli apaznanyja i zatrymanyja, da taho ž, abvinavaŭčaje videa ź mietro ŭtrymlivała prykmiety mantažu.
«U kančatkovym vyniku rašeńnie było zasnavana vyklučna na pryznańniach, da jakich ich prymusili», — reziumuje Biek.
Jana nahadvaje, što ŭ pracesie suda abvinavačvanyja tak i nie zmahli rastłumačyć, što mieli na ŭvazie pad «destabilizacyjaj biełaruskaha hramadstva» ŭ jakaści svajoj mety, a Uładzisłaŭ Kavaloŭ i zusim admoviŭsia ad svaich pryznalnych pakazańniaŭ padčas papiaredniaha śledstva.
Dźmitryj Kanavałaŭ i Uładzisłaŭ Kavaloŭ byli asudžanyja Viarchoŭnym sudom pa kryminalnaj spravie ab terakcie ŭ minskim mietro 30 listapada minułaha hoda. Kanavałaŭ nie abskardziŭ rašeńnie suda i nie źviartaŭsia z prašeńniem ab pamiłavańni da prezidenta. Kavaloŭ rašeńnie suda abskardziŭ i prasiŭ kiraŭnika dziaržavy ab pamiłavańni.
14 sakavika stała viadoma pra toje, što Alaksandr Łukašenka admoviŭsia pamiłavać asudžanych. 17 sakavika vyśvietliłasia, što pryhavory pryviedzieny ŭ vykanańnie.