U «Junivieście-M» Tarnaŭskaha pracuje Hanna Łukašenka

dapoŭniena

Miljanier spansaruje Prezidencki spartyŭny kłub, a jahonaj namieśnicaj pa markietynhu pracuje žonka Dźmitryja Łukašenki.

23.03.2012 / 14:58

Nastupnymi biznesoŭcami, suprać jakich byli ŭviedzienyja sankcyi, paśla Uładzimira Piefcijeva stali Anatol Tarnaŭski i Juryj Čyž. Pra apošniaha ź ich biełaruskaje hramadstva viedaje dobra, ale chto taki Tarnaŭski?

Tarnaŭski treci źleva.

61-hadovy piensijanier, kavaler Kryža Jefrasińni Połackaj Anatol Tarnaŭski naradziŭsia ŭ Daniecku. Jaho suviazi ź Biełaruśsiu pačalisia z tranzitu rasijskaj nafty. Jon byŭ vice-prezidentam rasijskaj «Słaŭnafty» pa suviaziach z SND. Jak adznačali rasijskija ŚMI, Tarnaŭski sprabavaŭ prasunuć kampaniju na ŭkrainski rynak naftapraduktaŭ. Z sychodam z «Słaŭnafty» jon pačaŭ bolš plonna pracavać ź Biełaruśsiu. Kampanija «Juniviest-M» była zarehistravanaja ŭ 2001 hodzie. Ciapier praca ŭ našaj krainie praciahvajecca šmat u čym za košt plonnaha supracoŭnictva ź Dźmitryjem Łukašenkam, synam kiraŭnika dziaržavy.

Darečy,

namieśnicaj pa markietynhu hienieralnaha dyrektara «Juniviest-M» pracuje žonka Dźmitryja, Hanna Łukašenka.

Śpis partnioraŭ Prezidenckaha spartyŭnaha kłuba kaža sam za siabie — «Trajpł», Biełaruskaja kalijnaja kampanija, Biełteleradyjokampanija, «BT Telekamunikacyi» Piefcijeva (suprać jakoj sankcyi byli ŭviedzienyja raniej)…

I siarod ich «Juniviest-M». Kampanija — adzin z najbujniejšych niedziaržaŭnych eksparcioraŭ naftapraduktaŭ, naroŭnie z «Trajpłam».

Tarnaŭskamu dazvolili zaniacca ŭ Biełarusi nieruchomaściu, i jon imkliva ŭvarvaŭsia na rynak. Ciapier «Juniviest-M» skančvaje zabudoŭvać kvartał na miescy turmy na vulicy Kalvaryjskaj. Heta adna ź niešmatlikich budoŭlaŭ, jakija padčas kryzisu nie spynialisia. Aproč taho,

za MKAD Tarnaŭski stvaraje elitny kvartał «Notynhiem», ź pieršym u krainie holf-kłubam

U rehijonach «Juniviest-M» maje trochzorkavy hatel «SłavinaSport» (Žłobin), a taksama źbirajecca budavać zabaŭlalny centr «Ekvatar» u Breście. U jakaści sacyjalnaj nahruzki — siadziba Vańkovičaŭ u Minsku.

Jak i Čyž, Tarnaŭski maje va ŭłasnaści restarany — pradstaŭničy «Bieła Roza» i niedarahuju sietku piceryj «Limančeła».

Jahor Marcinovič