У Брэсцкай вобласці з-за спальвання сухой травы загінулі чатыры чалавекі

03.04.2012 / 10:09

У Брэсцкай вобласці ў сакавіку з-за спальвання сухой расліннасці загінулі чатыры чалавекі, яшчэ чатыры — атрымалі траўмы.

Як паведаміў прэс-сакратар Брэсцкага абласнога ўпраўлення МНС Сяргей Машноў, у ліку загінулых — 79-гадовая жыхарка вёскі Закляценне Драгічынскага раёна, якая атрымала апёкі пры спальванні смецця на сваім падворку і памерла ў бальніцы.

Пяцідзесяцідвухгадовы жыхар вёскі Навасады Брэсцкага раёна, які спрабаваў тушыць на прысядзібным участку мясцовай пенсіянеркі ўзгаранне сухой травы, таксама памёр ад апёкаў у бальніцы.

У зонах выгарання сухой расліннасці знойдзены два загінулыя: у Пінскім раёне ў садовым таварыстве «Васілёк» было знойдзена цела 75-гадовага жыхара Пінска, у вёсцы Забалацце Маларыцкага раёна — 79-гадовага мясцовага пенсіянера. Яшчэ чатыры пацярпелыя знаходзяцца на лячэнні ў бальніцах.

Як паведаміў Машноў, у сакавіку 2012 года ў вобласці супрацоўнікі МНС 845 разоў выязджалі на тушэнне сухой расліннасці. У выніку выпальвання трава і кустоўе выгаралі на плошчы больш як 581 гектар. За гэты час былі зарэгістраваны 32 пажары ў лясах на плошчы 15,9 гектара і 11 пажараў на торфамасівах на плошчы 2,4 га. «З-за неасцярожнасці пры выпальванні сухой расліннасці ў рэгіёне адбылося 40 пажараў у прыватным жылым сектары, у выніку якіх агнём знішчана 39 пабудоў і 26 — пашкоджаны», — адзначыў прэс-сакратар Брэсцкага абласнога ўпраўлення МНС.

Ён падкрэсліў, што ў сакавіку 2011 года ў вобласці супрацоўнікі МНС 103 разы выязджалі на тушэнне сухой расліннасці. «Рэзкі рост такіх здарэнняў сёлета звязаны як з сухім цёплым і ветраным надвор’ем, так і з бестурботнасцю і безадказнасцю грамадзян», — падсумаваў Машноў.