Музыка памежжа Беларусі і Літвы

У Браславе адкрылася выстава, прысвечаная традыцыйнай музыцы канца ХІХ — пач. ХХ ст.

03.04.2012 / 11:51

Граюць Каця Радзівілава і Гінтарас Андрыяўскас.

Выступае ансамбль «Паазер’е».

Фрагмент выставы.

У Музеі традыцыйнай культуры Браслава адбылося адкрыццё фотавыставы «Музыканты Селонскага краю», на якой былі прадстаўлены фотавыявы музыкаў Літвы канца ХІХ — пач. ХХ ст., а таксама музычныя інструменты з фондаў Браслаўскага музейнага аб’яднання.

На выставу завіталі шматлікія госці, у тым ліку і ўдзельнікі Міжнароднага этнамузычнага летніка, які праходзіць у Браславе.

Спачатку выступіў фальклорны ансамбль «Паазер’е», створаны выкладчыкамі Пастаўскай дзіцячай музычнай школы пад кіраўніцтвам Анатоля Собаля. Парадавалі слухачоў мелодыямі, выкананымі на беларускіх традыцыйных інструментах: скрыпцы, цымбалах, гармоніку і барабане. Гучалі вальсы «Сустрэча», «Літоўскі вальс», «Гармошачка». Прысутныя пачулі «Груздаўскую кадрыль», запісаную ў мястэчку Груздава, што на Пастаўшчыне, якая даўней славілася сваім аркестрам з 40 музыкаў!

Выступіў з прамовай адзін з аўтараў выставы Гінтарас Андрыяўскас, які расказаў пра роднаснае падабенства беларускіх і літоўскіх музычных інструментаў, пракаментаваў некаторыя фотапрацы.

Цікава, што сярод фотаздымкаў можна было знайсці копіі старонак з каталога музычных інструментаў, які быў выдадзены ў 1904 годзе у Санкт-Пецярбургу.

Далей імправізавалі удзельнікі этнамузычнага летніка, якія гралі на скрыпцы, мандаліне, дудзе, гармоніку. Сярод выканаўцаў была Каця Радзівілава — таленавітая выканаўца беларускіх традыцыйных і старажытных мелодый.

У канцы імпрэзы госці пачулі аповед загадчыцы музея Элеаноры Зінкевіч пра калекцыю музычных інструментаў, якая збіраецца з пач. 90-х гадоў і неаднойчы экспанавалася на выставах у Браславе і іншых гарадах краіны.