Кіроўца Renault, які збіў траіх веласіпедыстаў, асуджаны на 7 гадоў

У мінулую пятніцу ў судзе Хоцімска завяршыўся разгляд рэзананснай справы. На лаве падсудных апынуўся кіроўца Renault Koleos, які насмерць збіў траіх веласіпедыстаў. Хлопцы загінулі на месцы здарэння.

17.04.2012 / 12:05

7 гадоў — максімальны тэрмін, прадугледжаны 317-м артыкулам КК «Парушэнне правілаў дарожнага руху або эксплуатацыі транспартных сродкаў». Прысуд пакуль не ўступіў у законную сілу: у бакоў ёсць 10 дзён на яго абскарджанне.

Нагадаем, аварыя адбылася ў лістападзе на адной з мясцовых дарог Хоцімскага раёна. «ДТЗ адбылося каля 20:15, калі ўжо сцямнела. За рулём Renault быў 35-гадовы мужчына, жыхар Масквы (ураджэнец Хоцімска). У спадарожным кірунку ехалі трое маладых веласіпедыстаў — 17-гадовы, 18-гадовы і 25-гадовы. Пазадарожнік збіў адразу траіх. Яны ехалі на двух роварах. Кіроўца аўтамабіля быў моцна п’яны», — паведамілі тады ў ДАІ.

Адразу пасля аварыі паведамлялася, што мужчына ў апошнія гады жыў у Маскве. У кастрычніку 2009 года ў Беларусі ён быў пазбаўлены правоў за кіраванне ў стане алкагольнага ап’янення, у лютым 2011-га ў Маскве атрымаў расійскае пасведчанне кіроўцы. Кіраваў аўтамабілем, зарэгістраваным у РФ.

Па факце ДТЗ была заведзеная крымінальная справа па частцы 3 артыкула 317. Як казалі прысутныя, падсудны не адмаўляў сваёй віны, раскайваўся і нават плакаў. Яму прызначанае пакаранне ў выглядзе 7 гадоў пазбаўлення волі з адбываннем пакарання ў папраўчай калоніі ва ўмовах пасялення. Ён таксама пазбаўлены права кіравання транспартнымі сродкамі на 5 гадоў. Акрамя таго, яму давядзецца выплаціць кампенсацыю маральнай шкоды на суму больш за 71 млн рублёў, матэрыяльнага — каля 9 млн, а таксама дзяржпошліну — каля 2 млн рублёў. Аўтамабіль Renault Koleos арыштаваны і пакуль знаходзіцца на штрафстаянцы.

Калі прысуд не будзе абскарджаны, ён уступіць у законную сілу ў пачатку наступнага тыдня.