Dziaržaŭny vandalizm na starych mohiłkach u Pinsku
U Pinsku na staražytnych mohiłkach, jakija źjaŭlajucca pomnikam historyi pačatku 19‑ha stahodździa, śpiłavali drevy i paškodzili nadmahilli. Tak zvanaja sanitarnaje dobraŭparadkavańnie pahostu adbyłosia z dazvołu haradzkoj ułady.
16.03.2007 / 09:46
U Pinsku na staražytnych mohiłkach, jakija źjaŭlajucca pomnikam historyi pačatku 19‑ha stahodździa, śpiłavali drevy i paškodzili nadmahilli. Tak zvanaja sanitarnaje dobraŭparadkavańnie pahostu adbyłosia z dazvołu haradzkoj ułady. Zaraz miascovyja krajaznaŭcy rychtujuć sudovy pazoŭ da čynoŭnikaŭ, adkaznych za razbureńni.
Pinskaje haradzkoje adździaleńnie Tavarystva achovy pomnikaŭ historyi i kultury śviedčyć, što na mohiłkach źniaviečanyja aharodžy, pavalenyja pomniki i kryžy. Śpiłavanyja 23 drevy. Havoryć siabra supołki Jarasłaŭ Zańkaviec:
«Heta lipa, klon i viaz. Drevy narmalnyja, zdarovyja, pramyja. Tam adzin buk – ekzot, štučna pasadžany. Adpaviedna, takija drevy nielha ŭvohule śpiłoŭvać. Na staruju častku mohiłak zajaždžali na hruzavym aŭtamabili. Tam, dzie pachavańni Butrymoviča i Ordy».
U Pinskim harvykankamie zajaŭlajuć, što paśla tak zvanaha lesapavału na mohiłkach zroblenyja arhanizacyjnyja vysnovy. Zvolnieny z pracy dyrektar dziaržaŭnaha pradpryjemstva «Rytuał‑hrado» Jury Biryła, jaki kiravaŭ pracami. Ale čynoŭnik pa‑raniejšamu nazyvaje heta sanitarnym dobraŭparadkavańniem, sankcyjanavany načalstvam.
«Kali ad vietru padaje takoje vialikaje dreva, to jano nakryvaje ad 22 da 35 pomnikaŭ. Ja vyrašyŭ pajści na kamisiju harvykankama, kab dali zhodu na znos drevaŭ. Atrymaŭ zhodu i my drevy śpiłavali».
Nie ŭtojvaje były dyrektar, što draŭnina z mohiłak skaraciła deficyt budmateryjałaŭ i paliva.
«Usiu dziełavuju draŭninu, tak jak na pradpryjemstvie jość svaja piłarama, vykarystali na doški. A na ŭsio astatniaje u nas jość svaja kačaharka».