Zaŭtra — novy sud nad byłym palitviaźniem Vasilom Parfiankovym

Jamu pahražaje pazbaŭleńnie voli terminam da hoda.

28.05.2012 / 13:06

Vasil Parfiankoŭ adrazu pa svaim vyzvaleńni 13 žniŭnia 2011 h., pryjechaŭ sustrakać inšych palitviaźniaŭ.

U aŭtorak, 29 maja, a 10-j hadzinie ŭ sudzie Pieršamajskaha rajona Minska, što na Tałbuchina, raspačniecca sudovy razhlad kryminalnaj spravy byłoha palitviaźnia Vasila Parfiankova. Jaho abvinavačvajuć u nievykanańni patrabavańniaŭ previentyŭnaha nahladu (art. 421 KK RB),

Spravu budzie razhladać suddzia Siarhiej Bandarenka, jaki 24 listapada 2011 hoda asudziŭ pravaabaroncu Alesia Bialackaha da 4,5 hadoŭ kałonii.

Abvinavačańnie miarkuje, što Vasil Parfiankoŭ trojčy parušyŭ režym previentyŭnaha nahladu. Adnojčy były palitviazień spaźniŭsia na adznačeńnie ŭ orhanie, jaki ažyćciaŭlaje nahlad. Dvojčy supracoŭniki milicyi prychodzili da jaho dadomu ŭ toj čas, kali Vasil vychodziŭ u kramu. Sankcyja artykuła 421 KK RB praduhledžvaje aryšt terminam da šaści miesiacaŭ albo pazbaŭleńnie voli terminam da adnaho hoda, dadaje spring96.org

Previentyŭny nahlad ustalavany za Vasilom Parfiankovym 5 studzienia 2012 hoda terminam na adzin hod. Pra zaviadzieńnie kryminalnaj spravy Pieršamajski rajonny addzieł Śledčaha kamiteta Minska paviedamiŭ byłomu palitviaźniu 19 krasavika.

Vasila Parfiankova adnym z pieršych asudzili za ŭdzieł u padziejach 19 śniežnia 2010 hoda. Aktyvist demakratyčnaha ruchu atrymaŭ 4 hady źniavoleńnia, pakarańnie adbyvaŭ u Aršanskaj kałonii.