Парфянкоў падаў касацыйную скаргу

14.06.2012 / 11:45

Актывіст грамадзянскай кампаніі «Гавары праўду!» Васіль Парфянкоў накіраваў касацыйную скаргу на прыгавор, вынесены яму 29 мая, паведаміла праваабаронца Наста Лойка.

Судом Першамайскага раёна Мінска Парфянкоў быў прызнаны вінаватым у парушэнні ўмоў прафілактычнага нагляду і прыгавораны да шасці месяцаў арышту.

Адбываць пакаранне Парфянкоў павінен у арыштным доме, умовы ўтрымання ў якім больш мяккія ў параўнанні з калоніяй.
Да ўваходжання прыгавору ў сілу пасля яго абскарджання асуджаны будзе знаходзіцца на волі.

***

27-гадовы Парфянкоў — першы асуджаны па справе аб масавых беспарадках 19 снежня 2010 года. 17 лютага 2011 года суд Фрунзенскага раёна сталіцы прызнаў яго вінаватым ва ўдзеле ў масавых беспарадках і прыгаварыў да чатырох гадоў пазбаўлення волі з адбываннем пакарання ў калоніі строгага рэжыму. Акрамя таго, Парфянкоў павінен быў выплаціць больш як 14 млн. рублёў за пабітае шкло дзвярэй у Доме ўрада падчас несанкцыянаванай акцыі апазіцыі.

Асуджаны адбываў пакаранне ў Аршанскай папраўчай калоніі. 11 жніўня 2011 года Парфянкоў быў памілаваны ўказам прэзідэнта. 19 красавіка гэтага года аддзел Следчага камітэта Першамайскага раёна Мінска інфармаваў Парфянкова аб распачынанні ў дачыненні да яго крымінальнай справы за парушэнне ўмоў прафілактычнага нагляду, устаноўленага судом 5 студзеня тэрмінам на год.

На думку праваахоўных органаў, Парфянкоў парушыў парадак выканання ўмоў прэвентыўнага нагляду, у прыватнасці адсутнічаў па месцы жыхарства без уважлівай прычыны, за што двойчы на працягу года падвяргаўся адміністрацыйнаму спагнанню.

Парфянкоў патлумачыў, што выходзіў з дома ў магазін на некалькі хвілін, каб купіць прадукты. «Сам прэвентыўны нагляд, мяркую, быў устаноўлены нада мной з мэтай абмежаваць мой удзел у грамадскай дзейнасці. Не лічу, што, калі выйшаў у магазін, я ўчыніў злачынства», — заявіў Парфянкоў.

У скарзе ён просіць адмяніць прыгавор і зазначае, што гэты прыгавор звязаны не з парушэннямі прафілактычнага нагляду, а з яго грамадзянскай пазіцыяй напярэдадні кампаніі па выбарах у Палату прадстаўнікоў.