ZŠA pradoŭžyli jašče na hod sankcyi ŭ dačynieńni da biełaruskich čynoŭnikaŭ

U śpisie dziesiaciora - Łukašenka z synam, Jarmošyna, Zimoŭski, Piatkievič i inšyja.

14.06.2012 / 19:34

Prezident ZŠA Barak Abama pradoŭžyŭ jašče na hod sankcyi ŭ dačynieńni da biełaruskich čynoŭnikaŭ, uviedzienyja 16 červienia 2006 hoda jaho papiarednikam Džordžam Bušam. Adpaviednaje paviedamleńnie za podpisam Abamy raźmieščana na aficyjnym sajcie Biełaha doma.

«U 2011 hodzie ŭrad Biełarusi pradoŭžyŭ nacisk na palityčnuju apazicyju, hramadzianskuju supolnaść i niezaležnyja ŚMI, — adznačaje Abama. —

Ułady samavolna aryštavali, zatrymali i pasadzili ŭ turmu hramadzian tolki za toje, što jany ŭdzielničali ŭ demanstracyjach, jak minimum adnaho pravaabaronca adpravili ŭ turmu pa sfabrykavanych abvinavačańniach, a niezaležnym ŚMI pieraškadžali ŭ raspaŭsiudžvańni infarmacyi i materyjałaŭ».

Prezident ZŠA padkreślivaje, što padobnyja dziejańni biełaruskaha ŭrada pakazvajuć, što «byŭ zrobleny krok nazad u raźvićci demakratyčnaha kiravańnia i pavahi pravoŭ čałavieka».

«Dziejańni i palityka peŭnych biełaruskich čynoŭnikaŭ i inšych ludziej, skiravanyja na zabaronu raźvićcia demakratyčnych pracesaŭ u Biełarusi, na parušeńni pravoŭ čałavieka, źviazanyja z palityčnymi represijami, i ŭciahnutaść u karupcyju, praciahvajuć zastavacca nadzvyčajnaj pahrozaj nacyjanalnaj biaśpiecy i źniešniaj palitycy ZŠA», — adznačaje Abama, padkreśliŭšy, što pa hetych pryčynach vymušany pradoŭžyć sankcyi.

Nahadajem,

u 2006 hodzie ZŠA ŭviali vizavyja i finansavyja abmiežavańni dla dziesiaci čałaviek: Alaksandra Łukašenki, Viktara Łukašenki (pamočnik prezidenta), Lidzii Jarmošynaj (staršynia CVK), Viktara Hałavanava (były ministr justycyi), Viktara Šejmana (pamočnik prezidenta pa asobnych daručeńniach), Dźmitryja Paŭličenki (tady — kamandzir SACHRa), Ściapana Sucharenki (tady — staršynia KDB), Alaksandra Zimoŭskaha (tady — staršynia Biełteleradyjokampanii), Uładzimira Navumava (tady — ministr unutranych spraŭ), Natalli Piatkievič (tady — namieśnik kiraŭnika Administracyi prezidenta).

BiełaPAN