Цэнтр Мізэса ўганараваны прэміяй «Templeton Freedom Awards»
Узнагарода імя выбітнага інвэстара і філянтропа Джона Тэмплтана штогод прысуджаецца «мазгавым цэнтрам» і грамадзкім арганізацыям, якія адстойваюць эканамічную свабоду і вяршэнства закону.
27.03.2007 / 08:25
Навукова‑даследчы цэнтр Мізэса першым у гісторыі Беларусі ўганараваны найвышэйшай узнагародай праграмы «Templeton Freedom Awards» за 2007 год.
Узнагарода, якая носіць імя вядомага інвестара і філантропа сэра Джона Тэмплтана, штогод прысуджаецца «мазгавым цэнтрам» і грамадскім арганізацыям, якія адстойваюць эканамічную свабоду і вяршэнства закону.
Пераможцы вызначаюцца пры садзеянні фонду эканамічных даследаванняў «Atlas Economic Research Foundation» у чатырох намінацыях: барацьба з беднасцю; сацыяльнае прадпрымальніцтва; этыка і каштоўнасці і свабода для студэнтаў і моладдзі, у якой цэнтр Мізэса і быў прызнаны найлепшым.
Сёлета ў конкурсе ўзялі ўдзел больш за 200 намінантаў з 53 краін. Акрамя беларускага цэнтра ўзнагарод удастоены дзве арганізацыі ў ЗША і адна ў Аргенціне. Уручэнне ўзнагароды пройдзе 24‑27 красавіка ў Філадэльфіі (ЗША).
Міжнароднае журы прызнала адукацыйныя праграмы НДЦ Мізэса «інавацыйнымі ў тым плане, што яны творча зроблены так, каб мінімізаваць рызыкі палітычных і адміністрацыйных пераследаў».
Паводле ацэнкі экспертаў, цэнтр змог аб’яднаць студэнтаў, маладых прадпрымальнікаў і актывістаў грамадзянскай супольнасці для абмену ведамі і вопытам, і такая дзейнасць прывяла да пашырэння колькасці людзей і арганізацый, якія імкнуцца да свабоды ў Беларусі.
Як прызнаўся кіраўніц НДЦ Мізэса Яраслаў Раманчук, «прыемна, калі твою работу ацэньваюць найлепшыя эканамісты і эксперты свету, калі ты з’яўляешся часткай глабальнай сістэмы прасоўвання ідэй свабоды, тэорыі і практыкі эканамічных пераўтварэнняў».
«Гэтае дасягненне паказвае, што той інтэлектуальны прадукт і тыя ідэі, якія мы прасоўваем у Беларусі, знаходзяцца на самым высокім сусветным узроўні», — зазначыў Яраслаў Раманчук.