Udzielniki incydentu ŭ Kalinkavičach pakaranyja štrafami
28.06.2012 / 14:52
26 červienia adbyłosia pasiadžeńnie kamisii pa spravach niepaŭnaletnich Kalinkavickaha rajvykankama, jakaja razhledzieła administracyjnyja spravy17-hadovych maładych ludziej, dziaŭčyny i chłopca.
Jak paviedamili ŭ adździele infarmacyi i hramadskich suviaziaŭ UUS Homielskaha abłvykankama, za abrazu słužbovaj asoby pry vykanańni im słužbovych paŭnamoctvaŭ dziaŭčyna pavinna vypłacić 2 młn. rubloŭ štrafu. U dačynieńni da ŭdzielnika bojki ŭ skandalnym videa składzieny čatyry administracyjnyja pratakoły. Jamu taksama vyniesiena pakarańnie ŭ vyhladzie štrafu ŭ 2,1 młn. rubloŭ i dva papiaredžańni. U adździele infarmacyi źviarnuli ŭvahu na toje, što, niahledziačy na hramadski rezanans, kamisija pryznačyła minimalnyja pakarańni.
Nahadajem, u pačatku maja ŭ internecie źjaviłasia videa, aŭtary jakoha śćviardžali, što ŭ Kalinkavičach na śviatkavańni 1 Maja milicyja biespadstaŭna źbiła niepaŭnaletniaha. Pryčym na videa byŭ pakazany tolki małady čałaviek, jaki lažyć na asfalcie i jakoha ŭtrymlivajuć milicyjaniery. Tekst aŭtara videa śviedčyŭ, što «chłopca źbiła milicyja, u jaho złamana šyja».
- Pravierka pakazała, što ŭ Kalinkavičach 1 maja adbyŭsia kanflikt pamiž dźviuma kampanijami maładych ludziej, jaki paźniej pieraros u bojku. Paśla prybyćcia na miesca zdareńnia supracoŭnikaŭ milicyi paciarpieły małady čałaviek, jaki znachodziŭsia ŭ niećviarozym stanie, akazaŭ im supraciŭleńnie. Była prymieniena fizičnaja siła. Maładoha čałavieka zatrymali i dastavili ŭ balnicu dla akazańnia miedycynskaj dapamohi, choć značnych traŭm u jaho nie było.
- Kali ŭ internecie źjaviłasia videa z zatrymańniem chłopca, kamientaryi nie prymusili siabie čakać. Pryčym z vykarystańniem niecenzurnych słoŭ i abraźlivych vyrazaŭ na adras supracoŭnikaŭ milicyi. Jak vyśvietliłasia paśla, asabliva pastarałasia dziaŭčyna zatrymanaha, za što jana i pakaranaja štrafam.