Minfin Rasii: Ci nie ekspartuje Biełaruś pad vyhladam rastvaralnikaŭ naftu?

28.06.2012 / 15:20

Minfin Rasii apasajecca, što Biełaruś pad vyhladam arhaničnych rastvaralnikaŭ ekspartuje naftu i naftapradukty.
Pra heta zajaviŭ stats-sakratar, namieśnik ministra finansaŭ RF Siarhiej Šatałaŭ, vystupajučy 28 červienia na kanfierencyi, arhanizavanaj Asacyjacyjaj jeŭrapiejskaha biźniesu, paviedamlaje rasijskaje ahienctva «Rośbiźnieskansałtynh».

«My sutyknulisia z tym, što ŭ niekalki razoŭ z Biełarusi vyras ekspart arhaničnych rastvaralnikaŭ na źniešni rynak. My apasajemsia, što hety tavar — prykryćcio. Nie vyklučana, što pad vyhladam rastvaralnikaŭ ekspartujucca naftapradukty», — skazaŭ Šatałaŭ.

Jon padkreśliŭ, što rasijski bok raźbirajecca z hetaj infarmacyjaj i sprabuje pryniać adpaviednyja miery. «Budziem damaŭlacca z biełaruskimi kalehami», — skazaŭ Šatałaŭ.

Namieśnik ministra finansaŭ RF nahadaŭ, što ciapier rasijski biudžet hublaje sur’ioznyja dachody, pakolki pry pastaŭkach nafty i naftapraduktaŭ unutry Mytnaha sajuza nie spahaniajucca ekspartnyja pošliny.

«Havorka idzie pra šmat miljardaŭ dołaraŭ. Jość peŭnyja kampiensacyjnyja miechanizmy. Biełaruś pry eksparcie nafty i naftapraduktaŭ sa svajoj terytoryi pavinna spahaniać ekspartnyja pošliny pa rasijskich staŭkach i pieraličvać ich u biudžet RF», — skazaŭ Šatałaŭ, dadaŭšy, što takaja miera tolki častkova kampiensuje straty rasijskaha biudžetu.