Афіцыйны Мінск не каментуе інфармацыю пра адмову Лукашэнку ў акрэдытацыі на Алімпіяду

25.07.2012 / 11:42

У Адміністрацыі прэзідэнта адмовіліся каментаваць інфармацыю пра тое, што Аляксандру Лукашэнку адмоўлена ў акрэдытацыі на цырымонію адкрыцця Алімпійскіх гульняў у Лондане.

«Мы не каментуем такія рэчы», — заявіў БелаПАН супрацоўнік прэс-службы кіраўніка дзяржавы.

Інфармацыя пра тое, што беларускі кіраўнік не зможа наведаць Лондан, з’явілася 24 ліпеня. У «Твітэры» на старонцы першага віцэ-спікера Дзярждумы Расіі, прэзідэнта Алімпійскага камітэта РФ Аляксандра Жукава з’явілася паведамленне: «Прэзідэнту НАК Беларусі А.Лукашэнку аргкамітэт алімпіяды ў Лондане не даў акрэдытацыю. Спорт — па-за палітыкай? А што рабіць з алімпійскімі каштоўнасцямі і традыцыямі? Кожны школьнік ведае, што ў Грэцыі на час гульняў заключалі перамір’е».

Алімпіяда ў Лондане пройдзе з 27 ліпеня па 12 жніўня, цырымонія адкрыцця адбудзецца заўтра, 26 ліпеня. Паводле звестак брытанскіх СМІ, на адкрыццё Гульняў прыбудзе рэкордная колькасць кіраўнікоў дзяржаў — прыкладна 120, але не прыедуць «лідары з чорнага спісу ЕС», у тым ліку Лукашэнка.

Варта адзначыць, што беларускі кіраўнік наведваў летнія Алімпійскія гульні 2008 года ў Пекіне і зімовыя Алімпійскія гульні 1998 года ў Нагана.

12 ліпеня гэтага года, выступаючы на адкрыцці міжнароднага фестывалю мастацтваў «Славянскі базар у Віцебску», Лукашэнка параўнаў яго з маючай адбыцца Алімпіядай. «Па колькасці ўдзельнікаў і разнастайнасці праграмы „Славянскі базар“ можа прэтэндаваць на званне летняй культурнай Алімпіяды», — сказаў Лукашэнка.

Паводле яго слоў, на фестывалі дзейнічае галоўны алімпійскі прынцып: мастацтва, як і спорт, па-за палітыкай, на сцэнічных пляцоўках пануе дух сумленнай барацьбы і шчырага захаплення талентам. «Алімпіяда вельмі адстае ад нашага „Базару“, яна палітызавана, там вельмі шмат праблем. А „Славянскі базар“ — гэта астравок вальнадумства, незалежнасці, і ў нашага „Славянскага базару“ многаму можна навучыцца», — лічыць беларускі кіраўнік.