U Maskvie zatrymali muzykaŭ za pieśniu sa słovam «Pucin»

Na fiestyvali MegaVeganFest u Maskvie vykanańnie sacyjalnaj pieśni sa zhadkaj Uładzimira Pucina, ciopła sustretaj publikaj, skončyłasia dla hurta «Makułatura» zatrymańniem.

07.08.2012 / 11:47

Im pahražaje da 15 sutak administracyjnaha aryštu.

Dabračynny fiestyval prachodziŭ 5 žniŭnia ŭ sadzie imia Baŭmana — niedaloka ad AUS «Basmannaje», kudy dastavili Jaŭhiena Alochina i Kanstancina Strakolskaha, raskazaŭ advakat muzykaŭ Vasil Kušnir.

Maładych ludziej, jakija vykonvajuć «sacyjalny chip-chop», zatrymali prosta padčas vykanańnia pieśni — treciaj pa liku, jak kažuć śviedki taho, što adbyłosia, u Twitter.

Pierad hetym jany praśpiavali pieśniu «Milicyjant budučyni», dzie ŭ prypievie jość takija słovy: «Ej ty, trutień, zapomni, Putin krutień na ukazatielnom palcie ziemnoj šar krutit. U mienia nikohda nie vstavał vopros za koho hołosovať — jedinoross».

Vasil Kušnir raskazaŭ, što paśla hetaj pieśni palicyjanty zrabili muzykam papiaredžańnie ab parušeńni hramadskaha paradku.

Na videazapisach, raźmieščanych u internecie, vidać, što padčas zatrymańnia muzyki nie supraciŭlalisia, hledačy supravadžali toje, što adbyvajecca, krykami «hańba».

Adzin z arhanizataraŭ fiestyvalu Aleh Ozieraŭ skazaŭ, što muzykaŭ užo sprabavali zatrymać u hety dzień — kali jany jechali na fiestyval.

U adździaleńni palicyi na muzykaŭ skłali pratakoł pa častcy pieršaj artykuła 20.1 KaAP — parušeńnie hramadskaha paradku, jakoje vyjaŭlajecca ŭ «vidavočnaj niepavazie da hramadstva, što supravadžajecca niecenzurnaj łajankaj u hramadskich miescach». Heta karajecca štrafam da adnoj tysiačy rubloŭ abo administracyjnym aryštam na termin da piatnaccaci sutak.

Vasil Kušnir kaža, što niepavahi da hramadstva, u jakoj abvinavačvajuć muzykaŭ, nie było, bo hledačy byli zadavolenyja, plaskali i kryčali «bis».

Aleh Ozieraŭ kaža, što «łajankavych słovaŭ ad muzykaŭ sa sceny nie čuŭ, choć byli słovy, jakich nie pačuješ pa Pieršym kanale». «Reč u tym, što my zahadzia prasili hurt paźbiahać maciukoŭ, bo mierkavałasia, što na fiestyval pryjduć dzieci», — tłumačyć jon.

Jak rastłumačyŭ suarhanizatar fiestyvalu, muzyki, vyjšaŭšy na scenu, paviedamili, što ich pasprabavali zatrymać pa darozie ŭ mietro, ale potym adpuścili. Kali ich zatrymali ŭžo na MegaVeganFest, nichto z palicejskich nie pradstaviŭsia, niahledziačy na prośby, kaža Ozieraŭ.

«Jany nie strymali słova aficera: spačatku paprasili muzykaŭ adyści ŭbok dla piśmovych tłumačeńniaŭ, a zatym ich zatrymali», — kaža jon.

Pa słovach advakata, usie jaho sproby vyzvalić Alochina i Strakolskaha z-pad varty da suda pravalilisia. Ź videazapisaŭ, apublikavanych u siecivie, vynikaje, što da adździaleńnia palicyi padtrymać muzykaŭ nočču pryjechali ich fany i prychilniki. «Jany byli tam, kali ja padjechaŭ», — raskazaŭ Kušnir. Jon pieradaŭ muzykam ježu i dyvanki, kab paspać na padłozie, bo kamiery dla snu nie prystasavanyja — tam jość tolki łavy šyrynioj 20 sm.

Čakajecca, što spravu muzykaŭ u paniadziełak razhledzić Basmanny sud Maskvy.
U kolki adbudziecca słuchańnie, pakul nieviadoma, kaža Kušnir.

Kanstancin Strakolski źjaŭlajecca redaktaram adździeła palityki sajta «Mnienija. Ru». Jaŭhien Alochin — małady piśmieńnik, łaŭreat premii «Debiut» 2004 hoda, aŭtar niekalkich knih i mnostva časopisnych publikacyj.

Heta nie pieršaje zatrymańnie muzykaŭ za vykanańnie imi nadzionnych pieśniaŭ. U žniŭni 2010 hoda byŭ zatrymany i asudžany na 10 sutak pa tym ža artykule 20.1 KaAP viadomy rasijski repier Noize MC. Narakańni tady jašče milicyjahtaŭ vyklikała pryśviečanaja im krytyčnaja pieśnia.