Дарадца Іванішвілі: Грузія ў СНД не збіраецца
Новыя ўлады Грузіі не лічаць актуальным пытанне вяртаньня краіны ў склад СНД, заявіў Гія Хухашвілі, дарадца Бідзіны Іванішвілі, лідара кааліцыі «Грузінская мара», якая перамагла на парламенцкіх выбарах.
04.10.2012 / 14:45
«Гэтае пытанне не стаіць на парадку дня новых уладаў Грузіі», — заявіў Хухашвілі, каментуючы заяву Аляксандра Лукашэнкі, што ён гатовы ўсяляк ініцыяваць пытанне вяртанья Грузіі ў СНД.
«Магчыма, прэзідэнт Лукашэнка і ўгаварыў бы Саакашвілі вярнуцца ў СНД», — дадаў Хухашвілі.
Раней Лукашэнка заявіў: «Я буду ўсяляк ініцыяваць вяртанне Грузіі ў Садружнасць Незалежных Дзяржаў».
Пра тое, што Грузія выходзіць са складу СНД, прэзідэнт Міхаіл Саакашвілі заявіў адразу пасля жнівеньскай вайны 2008 года. Гэтую ініцыятыву падтрымаў парламент, і ўжо 18 жніўня 2008-га МЗС Грузіі паведаміла нотай Выканаўчаму камітэту СНД, што краіна пакідае Садружнасць.