«Piekła»
Brytanskaja fantastyka na ekranie
Aŭtar «Na ihle» i «Niehłybokaj mahiły» Deni Bojł prapanuje hledačam vytvorča-ekzystencyjnuju žudasnuju fantastyku pra adnaŭleńnie Sonca.
08.05.2007 / 19:32
Vialikabrytanija, 2007, kalarovy, 107 chv.
Režyser: Deni Bojł
Roli vykonvajuć: Kilijan Merfi, Roz Birn, Klif Kiertys, Mišel Jiea, Krys Evans, Chirajuki Sanada, Troj Heryci, Mark Stronh
Žanr: Vytvorča-ekzystencyjnaja žudasnaja fantastyka
Adznaka: 5 (z 10)
Sonca hinie, a razam ź im hinie j čałaviečaja cyvilizacyja. Kab ažyvić zorku na Sonca adpraŭlajecca kaśmičny karabiel z bombaj. Ale na Merkuryi kasmanaŭty znachodziać čaŭnok, jaki adpraviŭsia da Sonca z analahičnaju misijaj – i źnik 7 hadoŭ tamu. Čaŭnok spraŭny, ale ekipaž ź nieviadomych pryčynaŭ skanaŭ. Ciapier – pad pahrozaju i novaja ekspedycyja…
U najmienšaj stupieni karcina brytanca Deni Bojła nahadvaje patasnyja halivudzkija «Armahiedony». Tak, jość misija vyratavańnia, ale hetaja misija – štodzionnaja, zvykłaja, pracoŭnaja. Kalidory karabla j mahma sonca pa-za iluminataram i ŭ snach – heta «Kaśmičnaja Adysieja» Kubryka – i «Salarys» Tarkoŭskaha, a zamknionaja prastora sparadžaje fobii j ekzystencyjnuju ahresiju. Budzionny hieraizm na złomie, nievynosny vybar, kanflikt spačuvańnia j abaviazku… Kisłarodu na ŭsich nia chopić, ale treba vykanać misiju – dyk kaho z ekipažu varta zabić? Na traich kasmanaŭtaŭ – adzin skafandr – i kamu vyratoŭvacca? «Prachadnaja» drama zalimitnaje sytuacyi.
Ale henaja drama zanadta racyjanalnaja, amal vytvorčaja. Z aktoraŭ vyłučajecca Kilijan Merfi – ź jakim Deni Bojł užo pracavaŭ na zombi-žachaŭcy «28 dniach paśla».
A ŭ «Piekle» iracyjanalnaść žanravych kašmaraŭ zanadta ścipłaja.
Znojdzieny čaŭnok z syhnałam tryvohi («Čužy», «Praz dalahlad»), paabpaleny j zvarjacieły kamandzir karabla, tryźnieńnie ad soniečnaha śviatła (tema šalnych navukoŭcaŭ, eŭrapiejskaje mistyki j Fredzi Kruhiera)…
Film Deni Bojła vykarystoŭvaje ŭsio – i nie dałučajecca ni da čaho. Takim moh być saviecki film pra podźvihi astranaŭtaŭ, kali b u SSSR zdymali kaśmičnyja filmy žachaŭ.
Film demanstrujecca ŭ kinateatrach «Pijaner» 8-10 traŭnia a 17.40 i 21.20 i ŭ «Domie kino» 11-13 traŭnia a 17.00 i 21.00.
Taksama na ekranie «Čałaviek-pavuk 3».