Alaksiej Šydłoŭski. 12 dziaciej atrucili chlorkaju

---

 

12 dziaciej atrucili chlorkaju

Na pačatku miesiaca ŭ mienskim Pałacy vodnaha sportu adbyłosia dramatyčnaje zdareńnie. Niečakana ŭzrovień utrymańnia chlorki ŭ pamiaškańni pieravysiŭ normu, u vyniku čaho 12 dziaciej trapili ŭ špital z atručańniem.

4-ha kastryčnika paśla 4-ch hadzinaŭ u pavietry nad terytoryjaj basejnaŭ źjaviłasia chlornaje vobłaka. U vadzie, śćviardžaje dyrektar basejnu Siarhiej Rapinčuk, na hety momant utrymańnie chloru było ŭ normie, značyć, chlor nie z vady vyparyŭsia, a trapiŭ u basejn inšym čynam.

Jak tolki hetaje vobłaka zaŭvažyli, usich z basejnu vyvieli, 40 čałaviek abśledavali, 12 dziaciej pryjšłosia adpravić u špitali, 5 ź ich paciarpieli mocna, a dvoje dyk i dobra atrucilisia.

Na nastupny dzień instancyi sklikali kamisiju, kab raśśledavała pryčyny. Dasiul nijakich vysnovaŭ ad hetaj kamisii niama. Nichto z MUS, prakuratury, štabu hramadzianskaj abarony nia vyjechaŭ terminova na miesca zdareńnia, a zrabili toje tolki na nastupny dzień.

Dyrektar Rapinčuk kaža, što za noč usia chlorka z pavietra asieła ŭ vadu, i tolki heta ŭžo ŭźniało jaje kancentracyju ŭ vadzie (na nastupny dzień kamisija vyjaviła pieravyšeńnie ŭtrymańnia chlorki ŭ vadzie ŭ 3 razy), a, maŭlaŭ, zamiery jašče za piać chvilinaŭ da zdareńnia pakazvali, što ŭsio ŭ normie. Dyrektar adkidvaje abvinavačańni ŭ parušeńni daziroŭki i vyłučaje dźvie versii.

Mahčyma, što z pryčyny sastarełaści abstalavańnia atrymałasia zapavietryvańnie filtru, i rastvor chloru pajšoŭ nie ŭ vadu, a ŭ pavietra.

Mahčyma, niechta padstroiŭ: «Abstanoŭka ŭ Pałacy ciažkaja, — kaža dyrektar. — Ciakučka kadraŭ 300%».

Rapinčuk kanfliktuje z hieneralnym dyrektaram kompleksu «Alimpijski», u skład jakoha ŭvachodzić vodna-spartovy kompleks Makiejčyka, i nie vyklučaje mahčymaści «dyversii» suprać siabie. Tut źmianiłasia 5 namieśnikaŭ dyrektara pa ekspluatacyi, tych, chto adkazvaje za padobnyja vypadki.

Treba adznačyć, što mienavita ŭ Pałacy vodnaha sportu, — u sportkompleksie «Alimpijskim», stvoranym u sakaviku 98-ha rasparadžeńniem Łukašenki, arhanizavana treniravalisia bajeviki RNIE (Rasiejskaha Nacyjanalnaha Adzinstva).

Alaksiej Šydłoŭski