25 SAKAVIKA: SVAJA NAŠA HISTORYJA

---

 

25 SAKAVIKA:
SVAJA NAŠA HISTORYJA

 

10 hadoŭ tamu na 25-ha sakavika ŭ Biełarusi źjaviłasia hazeta, nazva jakoj urešcie stała nazvaju śviata — «Dzień Voli». Za hety čas šmat čaho źmianiłasia ŭ nas i vakoł nas, ale staronki taho «Dnia Voli» nie pažoŭkli — ci to papiera papałasia admysłovaja, ci to źmiest taho śviatočnaha numaru jašče rana śpisvać u archiŭ. Try ŭstaŭnyja hramaty BNR, histaryčnyja ekskursy Anatola Sidareviča i Hienadzia Sahanoviča, ese Ŭładzimiera Arłova «Niezaležnaść — heta...», jakoje paśla šmatkroć na roznych movach buduć pieradrukoŭvać inšyja vydańni ŭ roznych krainach.

«Dzień Voli» staŭ znakam prykmietnaje źjavy taho času — adychodu intelihiencyi ad BNF. Amal usie inicyjatary novaha prajektu faktyčna «adkałolisia» ad «Navinaŭ» Frontu, u jakich supracoŭničali dahetul. Novaja partyjnaść vyhladała časam naviaźliva, asabliva ŭ hazetnaj spravie. Takim čynam, «Dzień Voli», a śledam za im hazeta «Svaboda» adrazu stali kankurentami «Navinaŭ BNF». «Naviny» nieŭzabavie źnikli, «Svaboda» ž naadvarot — nabirała abaroty i praisnavała amal da našaha času. Pakul nie pačała hublać pryncypy. Vyhladaje, što intelihiencyi, jakaja pakinuła Front, nie chapiła jakraz partyjnaści abo, dakładniej, samastojnaści — ćviordaści hetych samych pryncypaŭ. Spačatku ŭ «Svabodzie» źjaviłasia rasiejskaja mova, potym biełaruskaja z klasyčnaha pravapisu była pieraviedzienaja na narkamaŭku i — pajšło-pajechała. Kali «Svabodu» zakryli, u redakcyi ŭžo nie było ŭnutranaha pokliču vychodzić, nia hledziačy ni na što. Toj poklič, ź jakim vydavaŭsia «Dzień Voli», byŭ stračany.

Za minułyja 10 hadoŭ stała šmatkroć bolej śviadomych nośbitaŭ biełaruščyny. Miž inšym, biełarusizacyja apošniaha Maršu Svabody dazvalaje prahnazavać, što nas čakajuć cikavyja jakasnyja źmieny. Ale pra adnu takuju źmienu možna havaryć užo siońnia. Koliś 25 sakavika ŭsprymałasia najpierš jak antysavieckaje abo emihranckaje ci archiŭnaje śviata. Siońnia ničoha hetaha ŭžo niama. 25 sakavika za hety čas nabyło svaju NAŠU historyju i svaju NAŠU nazvu — Dzień Voli.

S.P.