Дэбют Шчаснага-драматурга
П’есу пра жыцьцё палітыка й кампазытара Міхала Клеафаса Агінскага «Фантазія ля-мінор» напісаў кіраўнік Нацыянальнай камісіі па справах UNESKO, пасол Уладзімер Шчасны. Напярэдадні 240-годзьдзя Агінскага п’еса 30 ліпеня будзе пастаўлена калектывам Менскага абласнога драмтэатру ў Залесьсі (Смургоншчына). Каб не афішаваць прозьвішча, Шчасны выступіў пад псэўданімам — Уладзімер Драздоў.
Браты Грым — сусьветная спадчына
Казкі братоў Якаба і Вільгельма Грым уключаны экспэртамі UNESKO ў Сьпіс сусьветнай спадчыны як «найважнейшы этап на шляху аб’яднаньня эўрапейскай і ўсходняй традыцый складаньня казак».
Нямецкая прэмія для турка
Аб’яднаньне нямецкіх кнігагандляроў прысудзіла прэмію міру слыннаму турэцкаму празаіку Архану Памуку. Летась прэмію атрымаў вугорац Пэтэр Эстэргазы, пазалетась — Сьюзан Зонтаг.
Уручаць яе 23 кастрычніка на цырымоніі закрыцьця Франкфурцкага кніжнага кірмашу. Прэмію Памуку прысудзілі за адлюстраваньне ў кнігах праблем суіснаваньня ісламу й хрысьціянства. На радзіме пісьменьніка апошнім часам моцна крытыкуюць: у лютым у інтэрвію швайцарскай «Tages-Anzeiger» ён назваў генацыдам масавую разьню, учыненую туркамі супраць армянаў у 1915 г.
АВ
