Šanoŭny spadaru Silicki! Ja chacieŭ by dałučycca da zakliku bajkatavać «Niamieckuju chvalu». Ale kateharyčna niazhodny z adnym vašym skazam: «Ja nie vystupaju za vydaleńnie rasiejskaj movy ź biełaruskaj medyjnaj prastory».
Što heta za reveransy? Rasiejskaja mova moža tut žyć tolki zamiest movy biełaruskaj. Kali kažuć, što biełarusy hublajuć svaju movu — heta nia značyć, što jany stanoviacca niamyja, jak ryby. Biełaruskaja mova vierniecca da žyćcia tolki tady, kali zamienić ci, dakładniej, vydałić čužuju movu nia tolki z medyjnaj, ale i inšych prastoraŭ. U jakich praporcyjach i jakim čynam — heta inšaja tema. Kali ja chaču zrazaŭ, to jak by ni liŭ ślozy pa cialatku, ja mušu jaho zabić i źjeści. I pakul my sami, biełarusy, nia ŭciamim hetuju lohiku, tak i budziem taptacca ŭ reveransach, pakul nia stracim našu movu biezzvarotna.
Ci, moza, vy, sanoŭny spadaru, u hłybini dušy — tajemny viehietaryjaniec i, nasamreč, zusim nia chočacie zrazaŭ?
Z pavahaju,
Henik Łojka, Miensk
P.S. Hety list ja napisau 13 žniŭnia, ale zamarudziŭ z adpraŭkaj, i voś užo čytaju šyroki adkaz sp.Silickaha. Tamu mnie taksama zachacielasia pašyryć svoj list u vyhladzie post scriptum.
Vašyja apanenty majuć racyju pa sutnaści. Niavarta vam vykručvacca, jak ujun na patelni. Vašyja adpirańni vyhladajuc pryblizna tak: «Ja nie vystupaju za źniščeńnie rasiejskaj movy na 70%! Nie! Zusim naadvarot, ja zaklikaju zachavać jaje (zaŭvažcie, zachavać!) na 30%». Razhortvajem pustyja dyskusii, a historyja ciače, a mova hinie.
Šanoŭny spadaru, navošta vy karystajeciesia rasiejskaj movaj? Vy chacieli, kab vas zrazumieli? Nu i cikava, jak vyniki? I dźviuchmoŭnyja vas nie zrazumieli, i ja, praklaty nacyjanalist, vas nie razumieju. Ale maju nadzieju, vy asensoŭvajecie, što palitolahaŭ vašaj chvali zaraz, rychtyk tych sieradniakoŭ, papierasadžvajuć, zaklajmiŭšy nacyjanalistami. Dyk stańcie ŭ pazicyju i prymuście choć kaho-niebudź razmaŭlać z vami pa-biełarusku, kali vaš surazmoŭca rasiejskamoŭny. Bo bicca ź vietrakami niamieckaj biurakratyi nia maje sensu, kali ŭ hety čas svajimi nahami topčaš svaju movu.
