Адна газета выйшла ўчора з артыкулам на першай паласе «Крыж Зміцера Дашкевіча». Памылка!
Такая памылка частая. Форма імені «Зміцер» палюбілася людзям, але трэба ўжываць яе правільна. У назоўным склоне Зміцер, а ва ўскосных склонах Змітра, Змітру, са Змітром. Множны лік: «сабраліся Змітры, дзе каторы — спанатры». Чый? Змітроў.
Гэтаксама выпадае «е» і ў памяншальным імені Змітрок. Памятаеце: Змітрок Бядуля, а не Зміцярок жа.
Такое скланенне склалася гістарычна. Ёсць прыказка: хіцер Зміцер, але і Саўка не дурны. Але: Змітроўскія Дзяды, вёска Змітровічы, канцэрт Змітра Бартосіка. І геройскі крыж, безумоўна, Змітра Дашкевіча, якому ўсе беларусы зычаць стойкасці ў веры, мужнасці ў выпрабаваннях і вернасці свайму народу.
2
0
0
0
0
0
