Беларускія палярнікі прыбылі ў Антарктыду 4

Удзельнікі пятай беларускай антарктычнай экспедыцыі прыбылі ў Антарктыду.

Як паведаміў начальнік Рэспубліканскага цэнтра палярных даследаванняў Уладзімір Філімонаў, 13–14 снежня праходзіла паветрана-транспартная аперацыя па дастаўцы расійскіх і беларускіх палярнікаў і іх экспедыцыйных грузаў з борта судна «Акадэмік Фёдараў» на станцыю «Маладзёжная» на лядовым кантыненце. Раніцай 14 снежня кіраўнік экспедыцыі Аляксей Гайдашоў у тэлефанаграме пацвердзіў факт прыбыцця беларускіх спецыялістаў на мацярык. «Самаадчуванне ўсіх удзельнікаў беларускай экспедыцыі ў норме», — адзначыў Філімонаў.

Паводле яго слоў,

у гэтым сезоне ў Антарктыдзе будуць працаваць тры беларускія спецыялісты. Акрамя кіраўніка экспедыцыі Аляксея Гайдашова, гэта — навуковы супрацоўнік Інстытута фізікі імя Б.І.Сцяпанава Нацыянальнай акадэміі навук Міхаіл Кароль і дацэнт кафедры мікрабіялогіі біялагічнага факультэта БДУ Уладзіслаў Мямін.

Падчас цяперашняй экспедыцыі яны будуць выконваць штодзённыя комплексныя лідарныя і радыеметрычныя даследаванні аэразолю ў атмасферы з выкарыстаннем беларускай сонечнай скануючай радыеметрычнай станцыі і мабільнага лідара, а таксама праводзіць вымярэнні спектраў адлюстравання выхаду скальных парод. Акрамя таго, плануецца праводзіць палеагеаграфічныя і фізіка-геаграфічныя даследаванні, штодзённыя вымярэнні агульнага ўтрымання азону з выкарыстаннем айчыннага эксперыментальнага ўзору азонаметра.

Як адзначыў Філімонаў,

мяркуецца таксама ацаніць перспектывы даследавання аднаўляльных жывых рэсурсаў прыбярэжных экасістэм Антарктыкі.

Нарэшце, у сувязі з планамі краіны па будаўніцтве ўласнай станцыі ў Антарктыдзе (да 2018 года) падчас цяперашняй экспедыцыі плануецца правесці ацэнку яе ўздзеяння на навакольнае асяроддзе. Гэтая справаздача будзе прадстаўлена ў міжнародныя органы, з тым каб эксперты пераканаліся, што будаўніцтва і дзейнасць самой станцыі не акажуць значнага негатыўнага ўплыву на экалогію Антарктыкі.

Філімонаў расказаў, што ў першы тыдзень на лядовым кантыненце ўдзельнікі экспедыцыі будуць займацца ўстаноўкай прыбораў, пачнуць выконваць навуковыя даследаванні і будуць займацца падрыхтоўкай тэхнікі для яе перакідвання на гару Вячэрняя. Як нагадаў начальнік РЦПД, усе работы палярнікаў прадугледжаны ў рамках дзяржпраграмы «Маніторынг палярных раёнаў Зямлі і забеспячэнне дзейнасці арктычных і антарктычных экспедыцый на 2011–2015 гады».

Экспедыцыя будзе доўжыцца чатыры месяцы, яе ўдзельнікі вернуцца дамоў у пачатку красавіка 2013 года.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ