Сям’я Цімашэнкаў эмігравала зь Беларусі ў ЗША на пачатку 1990‑х. Пасьля сканчэньня паліцэйскай акадэміі ў студзені 2006‑га Расэл Цімашэнка трапіў на службу ў 71‑шы ўчастак Брукліну. За паўтара года афіцэр зрабіў пятнаццаць асабліва складаных затрыманьняў.
У панядзелак 9 ліпеня падчас патрульнай службы Расэл спрабаваў спыніць машыну са злачынцамі, аднак быў расстраляны ў твар. Увесь час пасьля раненьня паліцыянт знаходзіўся ў коме. Расэл Цімашэнка памёр у суботу 14 ліпеня.
У сваім спачувальным слове мэр Нью‑Ёрку Майкл Блумбэрг сказаў, што «сам ён, як бацька, нават блізка ня можа ўявіць сабе гора бацькоў Расэла — Леаніда і Тацяны Цімашэнкаў». «Гэтыя людзі страцілі адзінага сына, аднак я хачу, каб яны ведалі, што Расэл быў сапраўдным героем», заявіў мэр.
«Гэта ўжо дзявяты выпадак у час майго знаходжаньня на пасадзе мэра, калі злачынцы забіваюць паліцыянта. Я зраблю ўсё, што ў маіх сілах, каб у часе маёй далейшай працы не адбылося дзясятага пахаваньня. Мы зробім усё, што ад нас залежыць, у памяць пра гэтага цудоўнага паліцыянта», — сказаў Майкл Блумбэрг.
Паводле словаў нью‑ёрскага мэра, усе паліцыянты былі застрэленыя крымінальнікамі зь незаконна набытай зброі. Блумбэрг настойвае на жорсткіх заканадаўчых актах. Мэр крытыкуе тых палітыкаў з Палаты прадстаўнікоў Кангрэсу ЗША, якія лічаць адпаведнае пакараньне на тры з паловай гады турмы вельмі жорсткім. Блумбэрг раіць гэтым палітыкам наведаць сям’ю загінулага паліцыянта.
У аўторак імёны забойцаў Расэла Цімашэнкі былі афіцыйна аб’яўленыя ў Бруклінскім акружным судзе. Гэта афраамэрыканцы Дэкстэр Бостык, Робэрт Эліс і Лі Вудз, якія належаць да адной зь нью‑ёркскіх крымінальных груповак.
Лі Вудз у часе затрыманьня прызнаўся дэтэктывам, што ў тую трагічную ноч, калі яны стралялі ў Цімашэнку і ягонага напарніка, яны мелі прадаць нелегальна набытыя пісталеты іншым крымінальнікам. Бостыку, Элісу і Вудзу выставілі абвінавачаньне ў наўмысным забойстве.
Паводле фэдэральнага заканадаўства, такія дзеяньні караюцца электрычным крэслам альбо ўвядзеньнем сьмяротнай іньекцыі. Аднак некалькі гадоў таму у штаце Нью‑Ёрк аб’явілі мараторый на сьмяротнае пакараньне. Максымум, што чакае абвінавачаных — пажыцьцёвае зьняволеньне бяз права на амністыю.
На агучваньне абвінавачаньня ў Бруклінскі суд прыйшлі чатырыста нью‑ёркскіх паліцыянтаў, Тацяна і Леанід Цімашэнкі, а таксама сваякі злачынцаў.
Паводле нью‑ёркскіх выданьняў, калі ў залю ўвялі абвінавачаных, многія паліцыянты не вытрымлівалі і называлі іх «нелюдзямі», «падонкамі» й «адкідамі».
«Мне трэба ўсяго пяць хвілінаў. Мне ня трэба ні пісталета, ні нажа. Я проста парву іх на кавалкі», — гаварыла Тацяна Цімашэнка.
Пасьля абвяшчэньня абвінавачаньня, калі скутых ланцугом злачынцаў накіравалі ў турму, бацька забітага паліцыянта Леанід Цімашэнка сказаў:
«Іхныя сваякі праходзілі паўз нас і глядзелі на нас так, быццам мы вінаватыя ва ўсім».
Паводле нью‑ёркскіх паліцыянтаў, яны не пакінуць без увагі сям’ю загіблага калегі.
У аўторак і сераду ў Дом рытуальных паслугаў ў Брукліне, дзе знаходзілася труна зь целам паліцыянта, на разьвітаньне з Расэлам прыйшлі сотні ўдзячных яму жыхароў Нью‑Ёрку.
Шмат людзей прысутнічалі на адпяваньні Цімашэнкі ў Бруклінскай праваслаўнай царкве ды на сёньняшняй урачыстай цырымоніі пахаваньня на Мараўскіх могілках у Стэйтан‑Айлэндзе.
