Зачыняецца беларускамоўная кавярня «Альба-кава» 4

Фота Сяргея Гудзіліна.

31 студзеня апошні працоўны дзень у кавярні «Альба-кава», што размяшчаецца на скрыжаванні Ульянаўскай і Чырвонаармейскай. Вылучала гэтую невялікую кавярню тое, што ўвесь персанал размаўляў па-беларуску.

Уладальнік Аляксандр Міхнюк кажа: «Гэта ж не маё памяшканне. Змяніўся ўласнік. А новая мятла па-новаму мяце. У мяне да іх ніякіх прэтэнзій няма.

Відаць, самі пабачылі, што на гэтым месцы можна нейкія справы весці. Ніякай палітыкі тут няма».

«Альба-кава» працавала ад верасня. Там можна было замовіць каву, узяць штосьці салодкае. Мінус — усё толькі на вынас. Памяшканне малое, таму столікі не было дзе паставіць. У цёплую пару, праўда, можна было вынесці сталы і на вуліцу.

Ці прыносіла кавярня прыбытак, пытаюся ў Аляксандра Міхнюка: «Прыносіла нешта, але не нашмат вышэй, чым сярэднія заробкі па Мінску. Сказаць, што я вельмі задаволены, то не. Хочацца большага «двіжняка», каб пасядзець можна было. Ды і нейкія бытавыя пытанні, як адсутнасць вады, чысціню было цяжка падтрымліваць, хоць дзяўчаты вельмі стараліся».

Аляксандр Міхнюк кажа, што «ёсць куды пашырацца. Зробім новае, каб больш зарабіць». Праўда, не ўдакладняе, што стаіць за гэтымі планамі.

«Гэта будзе ў сферы не вельмі пашыранай у Беларусі. Адно скажу, што будзе не ў Мінску.

Дзе? Месца вядомае, шмат хто там бывае. Прыходзьце 31 студзеня ў «Альбу-каву» усё раскажу», — сканчвае сп. Міхнюк.

Зміцер Панкавец

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ