Навукоўцы з Акадэміі навук цьвердзяць: колькасьць баброў у краіне перавысіла аптымальна дапушчальныя нормы. У Беларусі сёньня налічваецца больш за 45 тыс. баброў, што засялілі ўсе рэгіёны краіны. Павелічэньне колькасьці жывёлінаў прывяло да таго, што яны сталі прыносіць істотную шкоду лясам, гаспадарцы, дарогам.
Як адзначаюць заолягі, будаўнічая дзейнасьць баброў даводзіць да таго, што затапліваюцца значныя плошчы каштоўных пасадак лесу, сам лес засьмечваецца. Апроч таго, з-за павелічэньня плошчы жыцьцядзейнасьці баброў скарацілася прастора для іншых жывёлаў: аленяў, ласёў, казуляў. Гэта прывяло да таго, што палепшыліся ўмовы для зьвяроў, якія аднесеныя да катэгорыі «шкодных»: ваўкоў, лісіцаў, янотападобнага сабакі.
Чаго толькі ня робіць бабёр, каб шкодзіць беларускай эканамічнай мадэлі разьвіцьця! Яны разрылі мэліярацыйныя сыстэмы практычна паўсюдна ў краіне. Зафіксаваныя шматлікія факты, калі бабры будуюць сваё жытло ў беспасярэдняй блізкасьці ад дарог, пад інжынэрнымі збудаваньнямі, прытым хітруны ладзяць сабе норы даўжынёю да 20–30 мэтраў!
Паводле ацэнак адмыслоўцаў, штогод у Беларусі можна адлоўліваць 3–4 тыс. гэтых жывёлаў, каб аптымізаваць іхную колькасьць. Наш бабёр ужо выключаны з Чырвонае кнігі і ўнесены ў сьпіс паляўнічых відаў. Між тым, як адзначаюць заолягі, «бабры – гэта ня толькі каштоўны мех, але й смачнае й дыетычнае мяса й неабходная ў мэдыцыне «бабровая струя». Пры тым, намякаюць адмыслоўцы, дарослы бабёр можа заважыць больш як 30 кг. Калі справы гэтак пойдуць надалей, то рацыён беларусаў можна будзе істотна ўразнастаіць.
