У Гомелі 120 сямей, у якіх выхоўваюцца дзеці з цэрэбральным паралічам і сьпіннамазгавымі паталёгіямі, патрабуюць перагледзець памеры дапамог і пэнсій для іх.
26 ліпеня прадстаўнікі гомельскага гарадскога грамадскага аб'яднання "Асацыяцыя сямей дзяцей-інвалідаў з цэрэбральным паралічам і спіннамазгавымі паталогіямі" звярнуліся ў Адміністрацыю прэзідэнта, Міністэрства працы і сацыяльнай абароны і Палату прадстаўнікоў Нацыянальнага сходу з просьбай перагледзець сумы дапамог і пенсій.
Як паведаміла БелаПАН старшыня грамадскага аб'яднання Алена Максімава, бацькі, якія выхоўваюць дзяцей-інвалідаў з ДЦП і спіннамазгавымі паталогіямі, абураны нізкімі памерамі дапамог і пенсій.
"Пражытачны мінімум на аднаго чалавека складае цяпер 179.100 рублёў, а дапамога, якую атрымлівае маці па доглядзе за інвалідам першай групы, складае 44.775 рублёў, што ў чатыры разы менш за пражытачны мінімум. Чаму пры дасягненні дзіцем-інвалідам 18-гадовага ўзросту дапамога па доглядзе за ім памяншаецца? Што, дзяцей пасля 18 гадоў не трэба карміць, апранаць, купляць медпрэпараты? ДЦП - страшны дыягназ, які цягне апрача праблем, звязаных з перамяшчэннем, шмат спадарожных захворванняў: парушэнні інтэлекту, псіхікі, зроку, слыху. А калі дзіця-інвалід, якому споўнілася 18 гадоў, атрымлівае 140 тысяч пенсіі, а яго маці - 44 тысячы дапамогі па доглядзе, ці магчыма пражыць на такія грошы? Можа, на такую дапамогу змаглі пражыць бы тыя, хто ўстанавіў іх?" - зазначыла А.Максімава.
Паводле яе слоў, бацькі не могуць ніяк палепшыць сваё матэрыяльнае становішча самастойна, бо мусяць пастаянна знаходзіцца побач са сваімі дзецьмі. Таксама А.Максімава зазначыла, што надзеі на павелічэнне пенсій няма ніякай, але бацькі проста не могуць бяздзейнічаць і жыць як жабракі.
Асацыяцыя сямей дзяцей-інвалідаў з цэрэбральным паралічам і спіннамазгавымі паталогіямі звяртаецца да іншых грамадскіх арганізацый з просьбай падтрымаць іх зварот да ўладаў.
