Расійская кампанія «ЕўраХім» можа набыць блок-пакет акцый «Гродна Азота»

Расійскае ААТ «Мінеральна-хімічная кампанія «ЕўраХім» можа набыць блок-пакет акцый ААТ «Гродна Азот».

Пра гэта на прэс-канферэнцыі 19 лютага ў Мінску паведаміў старшыня Дзяржаўнага камітэта па маёмасці Георгій Кузняцоў.

«Я не магу сказаць, што так будзе на самой справе, гэта мае меркаванні», — сказаў ён. Пры гэтым чыноўнік адзначыў, што «нармальна ставіцца да гэтай кампаніі». «Мне падабаецца, што яе кіраўнікі з’яўляюцца выхадцамі з Беларусі, якім неабыякавы лёс нашай Радзімы», — адзначыў Кузняцоў.

Старшыня камітэта паведаміў, што пытанні прыватызацыі ААТ «Гродна Азот» абмяркоўваюцца два-тры гады.

Паводле яго слоў, гаворка ідзе пра тое, каб у яе выніку правесці мадэрнізацыю завода і павялічыць вытворчасць у два разы.

На гэтыя мэты неабходна прыкладна 1–1,5 млрд. долараў ЗША.

Паводле слоў Кузняцова, у Беларусі «цяпер такіх грошай няма». Чыноўнік не выключае, што расійская кампанія набудзе 25% плюс адну акцыю «Гродна Азота» і далей будзе ўкладваць інвестыцыі ў мадэрнізацыю завода.

Ён дадаў, што продаж акцый будзе ажыццяўляцца па рыначнай цане, але ацэнка прадпрыемства будзе ажыццяўляцца пасля адпаведнага рашэння на ўзроўні кіраўніцтва краіны.

БелТА

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ