Ермакова: Наша эканоміка без крэдыту МВФ не загнецца дададзена 7

Нацбанк Беларусі не будзе аднаўляць валютнае крэдытаванне фізічных асобаў. Аб гэтым сёння журналістам паведаміла кіраўнік Нацбанка Надзея Ермакова.

Як раней паведамлялася, на пасяджэнні Савета міністраў 13 лютага прэм’ер-міністр Міхаіл Мясніковіч заявіў пра мэтазгоднасць дазволіць валютнае крэдытаванне фізічных асоб на будаўніцтва жылля і прасіў Нацбанк падтрымаць яго пазіцыю. Па словах прэм’ера, у гэтым годзе аб’ём сродкаў насельніцтва, які накіроўваецца на будаўніцтва жылля, павінен вырасці больш чым на 15 трлн. рублёў. «І без належнай крэдытнай падтрымкі па даступным працэнтных стаўках рэалізаваць гэта будзе проста немагчыма», — падкрэсліў Мясніковіч.

Аднак, мяркуючы па словах Ермаковай, Нацбанку ўдалося пераканаць кіраўніка ўрада.

«Прэм’ер-міністр пагадзіўся з намі. Мы вызначылі, што можам крэдытаваць будаўніцтва жылля ў беларускіх рублях».

Як паведаміла Ермакова, магчымасць аднаўлення валютнага крэдытавання фізічных асоб на будаўніцтва жылля Нацбанк абмяркоўваў з кіраўнікамі большасці беларускіх банкаў. Яны катэгарычна запярэчылі супраць такой магчымасці.

«Сёння няма неабходнасці адмяняць рашэнне аб спыненні валютнага крэдытавання. Шмат праблем было з дэвальвацыяй у насельніцтва», — рэзюмавала Ермакова.

Акрамя таго, дадала яна, няма чаго фармаваць у людзей меркаванне, што беларускі рубель «ўжо нікуды не варты» і «толькі валюта нас выратуе». «Нам валюта патрэбна для іншых мэтаў», — падкрэсліла кіраўнік Нацбанка.

Зрэшты, дадала яна, тэарэтычна магчыма вернуцца да абмеркавання гэтага пытання праз год ці два.

Ермакова таксама паведаміла, што на гэтым тыдні дзяржаўныя банкі прымуць рашэнне, якім чынам крэдытаваць будаўніцтва жылля. Гаворка ідзе пра крэдыты для маючых патрэбу, патлумачыла яна.

Кіраўнік Нацбанка таксама заявіла, што прагноз па зніжэнні стаўкі рэфінансавання да канца года да 13–15% гадавых ніхто не адмяняў.

Гэта — мэта, да якой трэба імкнуцца, так як высокія стаўкі — тормаз эканомікі, падкрэсліла Ермакова.

Разам з тым, на яе думку, спяшацца не трэба ні ў якім разе, неабходна ўлічваць інфляцыю і іншыя эканамічныя паказчыкі, інакш сітуацыя можа выйсці з-пад кантролю.

У якасці станоўчай тэндэнцыі Ермакова адзначыла зніжэнне і стабілізацыю ставак на рынку міжбанкаўскіх крэдытаў, паведамляе БелаПАН.

«Калі нехта думае, што без крэдыту МВФ наша эканоміка загнецца, то — не загнецца наша эканоміка»,

— цытуе Інтэрфакс кіраўніка Нацбанка.

Візіт місіі МВФ чакаецца ў красавіку.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ