З 3 па 5 жнiўня Рух «За Свабоду» разам з моладзевай арганiзацыяй «Дзедзiч» правялi традыцыйны моладзевы летнiк каля мястэчка Воўчын, што ў Камянецкiм раёне Берасцейскай вобласцi. У летнiку прынялi ўдзел маладыя актывiсты дэмакратычнага руху i проста iнiцыятыўныя i вясёлыя людзi з Берасця, Баранавiчаў, Камянца.
Адразу адначым, што гэтым разам нiякiх праблем з праваахоўнымi органамi ўдзельнiкi летнiка не мелi: агучаны загадзя маршрут вандроўкi i месца летнiка былi змененыя арганiзатарамi за 20 хвiлiн да выезда.
Падчас летнiка адбывалiся спаборнiцтвы па валейболу i дартсу, у якiх бяспрэчным пераможцам стаў Змiцер Палойка, актывiст Руху «За Свабоду» з Баранавiчаў. Вечары па‑над возерам былi насычаныя забаўляльна‑конкурснай праграмай з прыемнымi падарункамi, дэбатамi на хвалюючыя тэмы як нашай краiны, так i свету ў цэлым. Найбольш гарачыя дыскусii i спрэчкi выклiкала пытанне «Цi ўплывае вера i рэлiгiя на сучаснае эканамiчнае развiццё дзяржавы», а начны канцэрт маладога барда Аляксандра Дземянчука з Камянца зноў аб’яднаў усiх ў агульнае кола сяброў.
4 жнiўня ўдзельнiкi летнiка наведалi мястэчка Воўчын, вядомае закiнутымi руiнамi касцёла 17 стагоддзя, а таксама як месца пахавання апошняга караля Рэчы Паспалiтай Станiслава Аўгуста Панятоўскага. На цяперашнi час непадалёк ад гэтай царквы праводзяцца раскопкi, i не так даўно быў выяўлены падмурак гаспадарчых збудаванняў палацава‑паркавага комплекса 17 стагоддзя.
Галоўнай падзеяй летнiка стала шоў‑праграма «Сапраўдны Беларус», падрыхтаваная сябрам «Дзедзiча» Паўлам Белавусам. Яна складалася з 8 рознапланавых конкурсаў на спрытнасць, лiдэрскiя якасцi, творчы талент, красамоўе, вакальныя здольнасцi, веданне народнага беларускага фальклору i адметных асаблiвасцяў гарадоў i мястэчак Беларусi. Пасля кожнага з конкурсаў адзiн з ўдзельнiкаў праекта пакiдаў яго i да фiналу дайшлi Яўген Сашко i Вiктар Клiмус. У апошнiм i галоўным конкурсе фiналiстам за 30 хвiлiн патрэбна было напiсаць вершык пра летнiк у якiм яны разам удзельнiчалi. У вершыку трэба было ўжыць прапанаваныя гледачамi словы, якiя асацыююцца з летнiкам: рамантыка, намёт, тушонка, Лукашэнка, вожык i бард .
І вось што атрымалася:
Сашко Яўген:
Тут рамантыка паўсюль:
Лес, намёты, Вiка вунь,
Шышкi, вожыкi, тушонка,
Тут ты знойдзеш сабе жонку.
Тут спявае бард Алесь —
Так, што замiрае лес,
А таварыш Лукашэнка
Ўвесь нервуецца страшэнна.
Ведай, дзядзька, колькi б жыў —
Ты бы так не адпачыў.
Клiмус Вiктар:
Рамантыка жыцця, змагання,
Кола намётаў у хвайнiку.
Сустрэнеш новае свiтанне
Тулiўшы да рукi руку.
Не гора брыдкая тушонка
І Лукашэнка не замiн,
У душы застанецца старонка,
Той незабыўны ўспамiн
Пра вожыкаў у начы вар’яцкiх,
Пра нашу веру, iмпэт i гарт…
Каб болей здольнасцяў мастацкiх —
Запеў бы, ды на жаль не бард.
У вынiку народнага галасавання пераможцам стаў сапраўдны беларус — Вiктар Клiмус. Галоўным падарункам пераможцу стаў спецыяльна падрыхтаваны адным з арганiзатараў летнiка, актывiстам Руху «За Свабоду» Дзянiсам Турчаняком копiю плана Берасця 17 стагоддзя, якi выдадзены накладам усяго 100 экзэмпляраў i мае вялiкую гiстарычную каштоўнасць.
Летнiк скончыўся, пакiнуўшы шмат прыемных уражанняў i цiкавых фотаздымкаў у фотаапаратах, а вялiкае вогнiшча яшчэ доўга будзе грэць душы ўдзельнiкаў прыемнымi ўспамiнамi.