З-за снегападу адменены шэраг спартыўных мерапрыемстваў

Цыклон «Хаўер» унёс карэктывы ў тэрміны правядзення чвэрцьфінальных матчаў Кубка Беларусі па футболе.

Сустрэча «Белшына» (Бабруйск) — «Тарпеда-БелАЗ» (Жодзіна) пройдзе, як і планавалася, 16 сакавіка, але не ў 15.00 і не на штучным полі ФК «Мінск», а ў 20.15 у размешчаным побач футбольным манежы.

Гульня «Мінск» — «Гомель» таксама была перанесена са штучнага поля ў манеж (16 сакавіка ў 13.00), аднак, як паведаміла прэс-служба сталічнага клуба, «у сувязі з надзвычайнымі ўмовамі надвор`я, якія пацягнулі калапс на аўтадарогах, дэлегацыя ФК „Гомель“ дагэтуль не прыбыла ў Мінск». У сувязі з гэтым матч адбудзецца ў манежы 17 сакавіка ў 19.30.

Мінскае «Дынама», якое 16 сакавіка сустрэнецца з салігорскім «Шахцёрам», у пятніцу пасля трэніроўкі ў манежы не змагло дабрацца да базы ў Стайках. У выніку было прынята рашэнне засяліцца ў гасцініцу «Вікторыя», размешчаную непадалёк ад манежа. Адсюль каманда і адправіцца на гульню. Падчас трэніроўкі дынамаўцы саступілі палову поля жодзінскім тарпедаўцам, якія з-за снегападу не змаглі правесці заняткі на вуліцы.

У сувязі з неспрыяльнымі ўмовамі надвор'я Беларуская федэрацыя баскетбола адмяніла ўсе матчы, запланаваныя на 16 і 17 сакавіка.

Як паведаміла прэс-служба БФБ, сустрэча жаночых каманд вышэйшай лігі "Вікторыя" — "Гарызонт" пераносіцца з 16 на 19 сакавіка, мужчынскіх каманд першай лігі БДУ — "Гродна-93 (2)" — з 16—17 на 22—23 сакавіка.

На няпэўны тэрмін перанесены запланаваны ў Гродне фінальны этап жаночага турніру ў першай лізе і матч мужчынскіх каманд вышэйшай лігі "Рубон" (Віцебск) — "Сож" (Гомель). Гэтая сустрэча павінны была адбыцца 15 сакавіка, аднак гамяльчане не змаглі прыехаць з-за непагадзі

Дзмітрый Уласаў, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ