Жэрара Дэпард'ё, які стаў галоўным героем навінаў, мабыць, заела туга па радзіме. Жыць у Расіі ён не будзе. Не дапамог ні ўручаны асабіста прэзідэнтам Расіі пашпарт, ні падораныя кватэры ў Грозным і Саранску, ні абяцанні працаўладкавання.
Актор заявіў, што любіць Расію і Францыю, але жыць мае намер у Бельгіі. Аб гэтым ён сказаў у эфіры тэлеканала Notele.
Дэпард'ё вырашыў пасяліцца ў невялікім мястэчку Нэшэн на поўдні Бельгіі, недалёка ад французскай мяжы. Там пралягае чыгунка, па якой можна хутка дабрацца да Парыжа.
Дарэчы, ён ужо набыў там чарговы дом і аформіў дакументы на жыхарства. Акрамя таго, Дэпард'ё паведаміў аб сваім намеры адкрыць у Нэшэне невялікі рэстаран.
Вядомы француз вырашыў змяніць месца жыхарства пасьля падатковай рэформы, якую меў намер увесці прэзідэнт яго роднай краіны. Прыбыткі, большыя за 1 мільён еўра на год, збіраліся абкласьці падаткам у 75%.
