БКК павялічыла выручку ў 2012 годзе, «Беларуськалій» — знізіў

Беларуская калійная кампанія (БКК), якая з’яўляецца трэйдарам «Беларуськалія» і «Уралкалія», павялічыла выручку ў 2012 годзе на 5,7%. Пра гэта гаворыцца ў паведамленні кампаніі.

Выручка асноўных акцыянераў БКК у 2012 годзе склала 5,6 млрд. долараў, у тым ліку выручка «Уралкалія» за мінулы год павялічылася на 38,1% да 2,9 млрд. долараў. Выручка «Беларуськалія», наадварот, знізілася ў параўнанні з 2011 годам на 15,6% да 2,7 млрд. долараў.

Варта адзначыць, што ў 2011 годзе суадносіны былі на карысць «Беларуськалія». Беларускі вытворца мінеральных угнаенняў атрымаў выручку ў 3,2 млрд. долараў, «Уралкалій» — у 2,1 млрд. долараў.

Як растлумачылі ў БКК, прапорцыя ў бок расійскага акцыянера кампаніі ў 2012 годзе змянілася за кошт зліцця «Уралкалія» з «Сільвінітам».

Нагадаем, у канцы 2012 года прэм’ер-міністр Беларусі Міхаіл Мясніковіч паведаміў пра планы аднавіць у 2013-м аб’ёмы валютнай выручкі, што атрымліваецца за кошт экспарту хлоркалію, на ўзроўні 2011 года. Тады краіна выручыла 3,2 млрд. долараў ад паставак калійных угнаенняў на знешнія рынкі.

Удзельнікі рынку чакаюць павелічэння спажывання калійных угнаенняў у 2013 годзе і таму лічаць задачу, пастаўленую беларускім прэм’ерам, выканальнай.

«У 2011 годзе аб’ём спажывання хлоркалію ў свеце склаў прыкладна 54 млн. тон, у 2012-м гэты паказчык знізіўся да 50 млн. тон. У 2013-м чакаецца аднаўленне рынку, гадавы аб’ём спажывання хлоркалію ацэньваецца сёлета на ўзроўні 55 млн. тон», — паведаміў БелаПАН эксперт калійнай галіны.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ