Старонка арыштаванага ў Бостане Царнаева Укантакце: іслам і каўказскія акцэнты 31

У сацыяльнай сетцы Укантакце застаецца адкрытай старонка падазраванага ва ўчыненні тэракта на Бостанскім марафоне Джахара Царнаева.

Ён быў падпісаны на ісламскія — мірныя — суполкі. І жыў інтарэсамі іншых суайчыннікаў-каўказцаў. Але — сярод іншага — змясціў відэа пра пакуты і ахвярнасць паўстанцаў у Сірыі.

За сёння старонку перапоўнілі сотні каментаў ад суродзічаў, а таксама жыхароў Расіі і былога СССР, на які прыпадае большая частка аўдыторыі гэтай сацыяльнай сеткі.

Джахара Царнаева (або Царні — калі дакладней па-чачэнску) злавілі ўчора ўвечары пасля пошуку, што доўжыўся амаль суткі.

Выбух на фінішы марафону здарыўся 15 красавіка. На аснове запісаў камер відэаназірання паліцыя склала фотаробат падазраваных. Адразу пасля гэтага адбылася чарада гвалтоўных падзей.

Спачатку страляніна выбухнула ў раёне Масачусэтскага тэхналагічнага інстытута. Там загінуў ахоўнік. Пасля паліцыя выйла на след падазраваных у прадмесці Уотэртаўн. Адбылася перастрэлка. Старшага з братоў Царнаевых, 26-гадовага, забілі. Меншаму ўдалося сысці ад пагоні.

Паліцыя загадала жыхарам раёна замкнуцца ў дамах, заблакавала мабільную сувязь і прачасала будынак за будынкам.

Джахара, які хаваўся ў лодцы, скмеціў адзін з жыхароў. Гэта здарылася пасля таго як паліцыя нікога не знайшла і адклікала загад заставацца ў дамах. Чалавек выйшаў да свайго прычала, а там — акрываўлены мужчына ляжыць.

Ён выклікаў паліцыю.

Спецназ прыляцеў неадкладна, на верталётах.

Пасля абвяшчэння пра арышт у Бостане радасныя людзі запоўнілі вуліцы горада.

На фінішы Бостанскага марафону адбыліся два выбухі, у выніку якіх загінулі тры чалавекі, у тым ліку васьмігадовы хлопчык, больш за 200 атрымалі раненні.

Сяргей Гезгала

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ