17 жніўня ў Полацкай карціннай галерэі адкрылася ўнікальная міжнародная выстава – Мастацкі тэкстыль (Беларусь-Літва). У экспазіцыі - працы 9 літоўскіх і 12 беларускіх мастакоў. З літоўскага боку арганізатарамі праекта выступіла Тэкстыльная гільдзія, з беларускага – Полацкая карцінная галерэя. Сярод удзельнікаў выставы вядомыя майстры: І. Шмідтэнэ, Л. Іоніке, Л. Гутаўскэнэ, С. Каткова, Н.Пілюзіна, Л. Скрыпнічэнка, Л. Густава, Л. Пятруль, Т. Козік і інш.
У дзень адкрыцьця адбыўся майстар-кляс па батыку, які праводзіла старшынька Тэкстыльнай гільдзіі Яланта Шмідтэнэ. У майстар-клясе таксама ўдзельнічалі беларускія мастачкі Святлана Каткова, Тацяна Козік і Марыэтта Голубева.
Тэкстыльная гільдзія аб'ядноўвае мастакоў-тэкстыльшчыкаў Літвы. Вось што пра сваю творчую арганізацыю распавяла Яланта Шмідтэнэ: «Наша арганізацыя мастакоў па тэкстылю усёй Літвы, наш офіс і наша галерэя знаходзяцца ў Коўне. Мы выстаўляецца ня толькі ў памяшканьнях, галерэяў, але і пад адкрытым небпм, напрыклад, у замках, там, куды прыходзяць людзі і дзе яны могуць захапіцца нашым мастацтвам».
Літоўскім мастакам вельмі спадабалася полацкая мастацкая галерэя. Гэты мастацкі музэй знаходзіцца ў старажытным корпусе былога езуіцкага калегіюма і мае вельмі багатую калекцыю беларускага выяўленчага мастацтва другой паловы 20 стагодзьдзя. Гэта бадай адзін з самых лепшых у Беларусі музэй сучаснага айчыннага выяяўленчага мастацтва.
Падчас майстар-класа прафэйсійныя мастачкі ня толькі паказвалі як нараджаюцца творы мастацтва на тканінах, але і вучылі гэтаму майстэрству навучэнцаў мясцовай мастацкай школы. Гаворыць адна з удзельніц майстар-кляса полацкая мастачка Тацяна Козік: «Яланта выканала вялікую працу на ятвабе, працуючы, падрабязна тлумачыла, што і як робіць. А мы, я, Святлана Каткова і Марыэтта Голубева, поруч працавалі творча. Ятваб і фарбы атрымалі навучэнцы мясцовай мастацкай школы, якія змаглі атрымаць першы ўрок гэтага майстэрства».
Працы, якія выканалі мастакі, засталіся ў падарунак полацкаму музэю. Ялантэ Шмідтэнэ паведаміла, што ў Літве сёньня зноў вельмі папулярны мастацкі тэкстыль: «Нашыя маладыя мастакі шмат езьдзяць па сьвеце і прывезьлі новыя тэхналёгіі, матэрыялы, фарбы. Мастацкі тэкстыль захапіў ня толькі мастакоў, але і проста аматароў што-кольвечы зрабіць прыгожае на тканіне».
Беларускія і літоўскім мастакі дамовіліся правесьці шэраг агульных мастацкіх праектаў.
