9 мая сталічная вуліца Карла Маркса стала пешаходнай.
Мікалай Ладуцька адчыняе знак пешаходнай вуліцы.
9 мая сталічная вуліца Карла Маркса стала пешаходнай.
9 мая сталічная вуліца Карла Маркса стала пешаходнай.
Выступленне ўдзельніка арт-праекта «Казей».
Духавы аркестр «Светач».
Кадр з перфомансу тэатра «вКубе».
Дзяўчаты зладзілі імправізаваны флэшмоб Free Hugs.
Мастак Аляксей Ляпін.
На пешаходнай вуліцы размясцілася шмат прадаўцоў хэнд-мэйд упрыгожанняў.
Падчас выступлення гурту «Ашэ Капаэйра».
Салістка гурту «Alta Mente».
Брызер Хейм выступае з нумарам на вуліцы Карла Маркса.
Удзельнікі арт-праекта «Казей» дыхаюць агнём.
З самай раніцы на вуліцы натоўпу не было — там-сям магчыма было пабачыць некалькі пар, якія шпацыравалі ўздоўж столікаў з хэнд-мэйд упрыгожаннямі. Народ пачаў падцягвацца а палове на першую, калі ля Нацыянальнага гістарычнага музея зайграў апрануты ў сярэднявечныя строі гурт «Alta Mente».
Праз некалькі метраў ад іх групу людзей забаўляў фокусамі спрытны артыст з клуба «Ілюзіён», а недалёка чуліся гукі нацыянальных бразільскіх інструментаў — там паказальны выступ ладзілі ўдзельнікі гурту «Ашэ Капаэйра».
На афіцыйнае адкрыццё прыехаў старшыня Мінгарвыканкама Мікалай Ладуцька, на ганак побач з музеем вынеслі штосьці схаванае пад тканінай залатога колеру — пазней аказалася, што гэта новы знак для пешаходнай зоны.
«Вуліца Карла Маркса — сімвал сталіцы, — казаў Ладуцька. — Тут практычна кожны будынак з'яўляецца гісторыка-культурнай спадчынай горада». Ён адзначыў, што восенню, калі завершацца працы па аздабленні фасадаў будынкаў, стане пешаходнай і вуліца Рэвалюцыйная.
Далей гледачоў чакала сапраўды насычаная праграма: шоу ад артыстаў цырка KRESIVA, канцэрт народнага ансамбля народнай песні «Гаманіна», калектыву «A_Due», тэатра танца «Алтана», тэатра «вКубе», калектыву «Хорціца», выступленні канцэртнага духавога аркестра «Светач» і капэлы беларускіх духавых інструментаў «Гуды», ВІА «Е-гурт».
«У сацыяльных сетках ёсць суполка «Мінск. Карла Маркса», там у абмеркаваннях існуе спецыяльная тэма — паведаміла начальнік аддзела культуры адміністрацыі Ленінскага раёну Аксана Нікіціна. — Яна называецца «Прадстаўленне заяваў» , там ёсць расклад на пэўныя даты. Кожны калектыў можа напісаць туды, пакінуць спасылку на суполку, відэа ці аўдыё. Мы гэта праслухваем, праглядаем, а пасля ўзгадняем час і месца.
Часам мы вымушаны прапаноўваць гутрам іншыя варыянты. То бок калі выступленне занадта гучнае, мы шукаем для іх іншую пляцоўку, бо ўсё ж тут жылыя дамы, і мы павінны лічыцца з меркаваннем жыхароў вуліцы. У мінулым годзе былі незадаволеныя, але, падаецца, у гэты раз мы ўсё ўлічылі. Я думаю, у гэтым сезоне будзе меньш праблемаў».
З цягам часу народу становіцца ўсё больш, праз кожныя сто метраў грае ўжо зусім іншая музыка, аматары фрызбі збіраюць сваю каманду. Пляцоўка ля музея зноў поўная народу: там створанае павуцінне з чырвонай атласнай стужкі, пасярэдзіне стаяць людзі ў чырвоным, з барабанам, сцягам і ў піянерскіх гальштуках. Паміж стужкамі прабіраюцца людзі ў масках і чорных строях — у разгары перфоманс ад тэатра «вКубе».
«Перфоманс называецца «70 метраў чырвонай стужкі», — каментуе рэжысёр Вераніка Аганесян. — Гэта, па-мойму, вельмі лагічны тэматычны перфоманс. Перапоўненыя патрыятызмам і верай ў светлую будучыню піянеры — з аднаго боку, і чорная сіла, якая імкнулася захапіць гэтыя 70 метраў чырвонай стужкі — з другога.Але ў апошніх нічога не атрымалася, бо вера ў светлую будучыню заўжды перамагае.
Перфомансы тэатру «вКубе» магчыма было пабачыць на вуліцы Маркса летась, яны плануюць выступаць тут і ў гэтым годзе. Хоць часам бываюць накладкі.
«Проста тут мітусьня, вельмі шмат усяго адбываецца, і схема вулічных выступленняў не адпрацаваная да канца», — працягвае Вераніка.
Завяршае праграму традыцыйнае фаер-шоу ад мінскага арт-праекту «Казей».
«Мы не будзем выступаць тут штотыдзень, — кажа харызматычны Паша, рэжысёр. — Адміністрацыя не мае дазволу на правядзенне фаер-шоу кожныя выходныя. Сёння народу сапраўды шмат, напэўна, чалавек пад 500 прыйшло на выступленне.Пляцоўка вельмі зручная, адзінае, што не вельмі падабаецца — калі натоўп гледачоў імкнецца заняць частку тэхзоны, дзе падпальваецца і тушыцца рэквізіт. Мы кажам, што знаходзіцца тут небяспечна, але далёка не ўсе нас слухаюць».
За некалькі хвілін да пачатку на пляцоўку прыходзяць супрацоўнікі МНС, побач з імі стаіць вогнетушыцель. Абыйшлося без інцыдэнтаў, і дзесьці а палове на адзінаццатую большасць людзей сыходзіць — напэўна, глядзець салют.
Але невялікія групкі людзей ўсё ж застаюцца — сядзяць на тратуары і спяваюць пад гітару «Ляпісаў», да іх падыходізць арганізатар з прапановай скончыць музычную праграму. Але ахвотных паспяваць менш не становіцца. Праз некаторы час гаснуць ліхтары, і аматары начных спеваў вымушаныя разысціся.
Пешаходная зона адчынена з 10 раніцы да 23 гадзін вечара ў выходныя, а таксама ў святочныя дні. Але ўсе выступленні павінны сканчвацца да 21 гадзіны. Упершыню пешаходная зона ў Мінску была адкрыта 12 мая 2012 года. Падобная практыка распаўсюджаная ў многіх гарадах свету.
