Капітан беларускай зборнай па хакеі: Гулялі нядрэнна, мне здаецца, годна 4

Капітан нацыянальнай зборнай Беларусі па хакеі Канстанцін Кальцоў дае інтэрв'ю пасля прылёту ў Беларусь. Фота Сяргея Сацюка, БелаПАН.

Паводле меркавання капітана нацыянальнай зборнай Беларусі па хакеі Канстанціна Кальцова, каманда на чэмпіянаце свету «гуляла нядрэнна, годна». Пра гэта ён заявіў у інтэрв’ю БелаПАН 15 мая ў нацыянальным аэрапорце Мінск пасля вяртання каманды ў Беларусь.

«Не ведаю, чаго не хапіла. Гулялі нядрэнна, мне здаецца, годна, змагаліся да канца. Пакуль яшчэ майстэрства замала, ёсць да чаго імкнуцца, працаваць», — сказаў Кальцоў.

На чэмпіянаце свету, які працягваецца ў Стакгольме і Хельсінкі, зборная Беларусі заняла 14-е месца сярод 16 удзельнікаў. На папярэднім этапе беларусы прайгралі шэсць матчаў з сямі і, заняўшы 7-е месца ў групе з васьмі каманд, не трапілі ў плей-оф. 3 мая каманда Андрэя Скабелкі ўступіла Чэхіі (0:2), 5 мая абыграла Славенію (4:3), 6 мая была слабейшай за шведаў (1:2), 10 мая — канадцаў (1:4), 11 мая — нарвежцаў (1:3), 13 мая — датчан (2:3), 14 мая — швейцарцаў (1:4).

Кальцоў адзначыў, што тыя ж швейцарцы цяпер аб’ектыўна мацнейшыя за беларусаў, а таксама выказаў меркаванне, што каманда была не зусім гатовая псіхалагічна. Паводле слоў капітана, адпраўляючыся на чэмпіянат, беларусы разлічвалі на лепшы вынік: «Зразумела, што ўсе едуць не за 14-м месцам. Проста так атрымалася. Цяжкавата настройвацца, калі прайграеш саперніку, якога можна абыграць. Нарвегію, Данію можна было абыграць, аднак пасля такіх паражэнняў упэўненасць знікае».

Ён не стаў разважаць на тэму, наколькі такі вынік на чэмпіянаце свету аб’ектыўны для рэалій беларускага хакея. «Цяпер я не хачу рабіць высновы, паслухаю кіраўніцтва, спецыялістаў, потым, калі вам будзе цікава, выкажу сваё меркаванне», — сказаў Кальцоў.

Капітан яшчэ раз нагадаў сваю пазіцыю адносна частых зменаў галоўнага трэнера ў беларускай зборнай. «Мінімум гадоў пяць дайце папрацаваць аднаму чалавеку», — рэзюмаваў ён.

Нагадаем, за апошнія тры гады зборную Беларусі вазілі на чэмпіянат свету тры розныя трэнеры: у 2011-м — Эдуард Занкавец, у 2012-м — Кары Хейкіля, у 2013-м — Андрэй Скабелка. Вынік зборнай Беларусі на ўсіх гэтых турнірах быў нязменным — 14-е месца.

Аляксандр Ванковіч, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ