Знайсці і купіць амаль любую беларускамоўную кнігу цяпер не праблема. Апроч кнігарняў сеткі «Белкніга», незалежных «Кніжнага салона» і кнігарні «логвінаЎ», існуе некалькі сайтаў з вялікім каталогам.
Іншае пытанне — цэны, якія ў залежнасці ад прадаўца могуць адрознівацца ў некалькі разоў. «Наша Ніва» параўнала цэннікі ў кнігарнях па некалькіх пазіцыях. Асартымент крамаў моцна адрозніваецца, таму кнігі адбіраліся па наяўнасці ў большасці з кнігарняў.
Раскошнае перавыданне кнігі Уладзіміра Арлова «Краіна Беларусь» стала сапраўднай падзеяй на беларускім кніжным рынку. Да таго ж нядаўна выйшлі пераклады «Краіны Беларусь» на рускую і англійскую мову. Самая нізкая цана на кнігу на сайце Prastora.by — 334 900 рублёў, самая высокая ў «Акадэмкнізе»: 353 650 рублёў.
Кніга барысаўскай пісьменніцы Алены Брава «Рай даўно перанаселены» трапіла ў лонг-ліст сёлетняй прэміі імя Ежы Гедройца і шмат кім лічылася фаварытам прэміі. Набыць яе можна бадай у кожнай кнігарні, але танней за ўсё — у «Кніжным салоне». А вось у краме «логвінаЎ» нацэнка самая вялікая. Кніга каштуе амаль у паўтара разу даражэй!
Падобная сітуацыя і са зборнікам эсэістыкі Нобелеўскага лаўрэата Чэслава Мілаша. «Родная Еўропа» ўвайшла ў чатырохтомнік пісьменніка. Цана на яе скача ад 40 тысяч да 100 тысяч, прычым найлепшая цана ў «Кніжным салоне».
«Шалом» Артура Клінава можна знайсці нават за 16 тысяч рублёў. Такі цэннік і ў сетцы «Белкнігі». У некаторых крамах сеткі яшчэ засталіся асобнікі, цана на якія не змянілася з моманту выхаду. У інтэрнэткрамах пераацэнка адбываецца хутчэй, таму на сайце imbryk.by за «Шалом» просяць ажно ў чатыры разы больш!
28-старонкавая казка «Каваль з Вялікага Вутану» культавага англійскага пісьменніка Джона Р.Р. Толкіна мае самую вялікую розніцу ў цэнах. За 11 тысяч рублёў яе можна набыць на Knihi.by, а за 48 тысяч — на Prastora.by.
«Цэны на кнігі залежаць перадусім ад пастаўшчыка, — тлумачыць таваразнаўца «Акадэмкнігі» Вольга Клычкова. — На адную і тую кнігу год таму і зараз могуць быць зусім розныя цэны. Напрыклад, «Рай даўно перанаселены» раней каштаваў 49 тысяч рублёў, а цяпер — 62 тысячы. Магчыма, з’явіўся новы наклад, але кнігі са старога накладу мы прадаём па пачатковым кошце». Па яе словах, нацэнка ў крамах «Белкнігі» па ўсёй краіне аднолькавая — 30%.
«Я арыентуюся на сярэднія цэны на кнігі, — кажа стваральнік «Імбрыка» Алесь Мазанік. — Калі нехта знойдзе тую самую кнігу за меншы кошт у іншай краме — на здароўе. Я не лічу, што «Імбрык» і іншыя крамы — канкурэнты, бо мы займаемся адной справай».
Дырэктарка кнігарні «логвінаЎ» Кацярына Пікірэня пагаджаецца, што ў незалежных кнігарнях нацэнка адрозніваецца ад той, што існуе ў дзяржаўных. Па яе словах, найбольшую частку даходаў даводзіцца выдаткоўваць на арэнду памяшкання.
Адрасы
«Акадэмкніга» (Мінск, пр. Незалежнасці, 72)
«Кніжны салон» (Мінск, вул. Калініна, 5)
«ЛогвінаЎ» (Мінск, пр. Незалежнасцi, 37а)
www.prastora.by
www.knihi.by
www.imbryk.by
Кошт дастаўкі ў інтэрнэткрамах
За перасылку па краіне «Белпошта» бярэ 3—5% ад кошту пасылкі. У Мінску куплю перадае кур’ер.
Запасны варыянт
Беларускамоўныя кнігі можна пашукаць і ў каталогу сайта OZ.by. Там можна знайсці некаторыя кнігі, якія цяжка купіць у кнігарнях.
