IFC назвала самыя актуальныя праблемы для беларускага бізнесу

Адміністрацыйныя працэдуры (праверкі, ліцэнзаванне, дазволы) перасталі ўспрымацца беларускімі суб’ектамі гаспадарання як найбольш сур’ёзныя перашкоды для вядзення бізнесу. Пра гэта заявіў кіраўнік рэгіянальнага прадстаўніцтва Міжнароднай фінансавай карпарацыі (IFC) ва Украіне і Беларусі Руфат Алімарданаў 11 чэрвеня на прэс-канферэнцыі ў Мінску, прысвечанай вынікам даследавання «Дзелавое асяроддзе ў Беларусі 2013».

Алімарданаў звярнуў увагу, што беларускія прадпрыемствы ў параўнанні з 2009 годам адчуваюць значна менш праблем з атрыманнем ліцэнзій. Падчас даследавання IFC, у якім бралі ўдзел 1.266 топ-менеджэраў і ўладальнікаў малых і сярэдніх прадпрыемстваў, большасць прадстаўнікоў бізнесу заявілі, што не маюць праблем з атрыманнем ліцэнзій.

«Прагрэс адзначаны ў сферы атрымання ліцэнзій. Больш за палову апытаных заявілі, што яны не сутыкаліся з сур’ёзнымі праблемамі пры атрыманні ліцэнзій», — сказаў Алімарданаў.

Ён таксама адзначыў, што прадстаўнікі бізнесу падчас даследавання адзначылі шмат паляпшэнняў, якія датычацца працэдуры атрымання дазволаў, і ўказалі на зніжэнне колькасці праверак.

«Аднак падчас даследавання стала відавочная і занепакоенасць бізнес-супольнасці такімі праблемамі, як нестабільнасць заканадаўства, недахоп кваліфікаванага персаналу і недахоп знешняга фінансавання», — канстатаваў Алімарданаў.

Так, 59% прадстаўнікоў суб’ектаў гаспадарання, якія бралі ўдзел у даследаванні, назвалі «нестабільнасць заканадаўства» перашкодай для вядзення бізнесу. 56% апытаных паказалі «недахоп кваліфікаванага персаналу» ў якасці перашкоды, які абцяжарвае працу бізнесу. Траціна ўдзельнікаў апытання (35%) назвалі «недахоп знешняга фінансавання» перашкодай для вядзення бізнесу.

Даследаванне «Дзелавое асяроддзе ў Беларусі 2013» праводзілася, каб ацаніць вынікі рэформ у сферы паляпшэння бізнес-асяроддзя краіны, рэалізаваных пры садзейнічанні IFC, а таксама прааналізаваць найбольш значныя змяненні ўмоў вядзення бізнесу, якія адбыліся з 2009 па 2012 гады. У межах даследавання было апытана больш як 1.200 кіраўнікоў камерцыйных арганізацый, якія ўяўляюць розныя сектары эканомікі, з усіх абласцей Беларусі.

Дзмітрый Заяц, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ