Анатоль Шумчанка
Старшыня РГА «Перспектыва» Анатоль Шумчанка затрыманы супрацоўнікамі міліцыі па шляху ў гандлёвы цэнтр «Паркінг» у Мінску.Як паведаміў актывіст «Перспектывы» Вячаслаў Піліпук, затрыманне адбылося каля 12.30. Разам з Шумчанкам затрыманыя карэспандэнт «Радыё Свабода» Ігар Карней і яшчэ два журналісты. Па інфармацыі «Беларускай асацыяцыі журналістаў», адзін з іх — журналіст газеты «Народная воля» Алесь Сівы, журналістка Tut.by Наталля Касцюкевіч.
Як распавёў Піліпук, Шумчанка разам з журналістамі ехаў да ГЦ на машыне ад рынку «Ждановічы». Па шляху аўтамабіль спынілі супрацоўнікі, як мяркуецца, Савецкага РУУС. Цяпер Шумчанка не выходзіць на сувязь і не адказвае на званкі.
Нагадаем, 27 чэрвеня на рынках і ў гандлёвых цэнтрах Беларусі адбываецца аднадзённая забастоўка прадпрымальнікаў,якія выступаюць супраць увядзення 1 ліпеня патрабаванняў тэхнічнага рэгламенту Мытнага саюза «Аб бяспецы лёгкай прамысловасці». Рашэнне правесці папераджальны страйк прадстаўнікі малога і сярэдняга бізнесу прынялі на форуме прадпрымальнікаў 24 чэрвеня ў Мінску, арганізаваным РГА «Перспектыва».
Прадпрымальніцкія страйкі праходзяць у Магілёве, Гомелі, Полацку, Касцюковічах і Баранавічах. У Мінску, паводле яго інфармацыі, зачыненыя як мінімум нехарчовыя шэрагі рынку «Ждановічы» і ГЦ «Паркінг».
Сёння раніцай на «Ждановічах» адбыўся сход каля 400страйкоўцаў-прадпрымальнікаў , якія абмеркавалі бягучую сітуацыю разам з кіраўніцтвам рынку і начальнікам аддзела гандлю і паслуг адміністрацыі Цэнтральнага раёна Мінска Наталляй Хмяльніцкай.
Прыкладна ў 11.40, пасля завяршэння сходу на «Ждановічах» да Шумчанкі, паводле яго слоў, падышоў намеснік начальніка Цэнтральнага РУУС Мінска Шарамецьеў і прапанаваў яму прайсці ў міліцэйскі пункт, размешчаны на тэрыторыі рынку, для размовы.
Шумчанка пацікавіўся, ці затрымліваюць яго, на што супрацоўнік міліцыі адказаў адмоўна. Пасля гэтага Шумчанка адмовіўся пайсці з ім і разам з журналістамі пакінуў рынак.
Пасля 14:00 журналістаў адпусцілі.
