Як паведаміла прадстаўнік Следчага камітэта Юлія Ганчарова, цела Таццяны Слонімскай знайшлі 18 ліпеня ў лесе каля вёскі Дварэц пад Мінскам. На целе былі нажавыя раненні. Родныя сёння правялі апазнанне.
Сумесна з супрацоўнікамі МУС адбылося і затрыманне падазраваных у забойстве. Гэта жыхары Мінска ва ўзросце 20-25 гадоў.
Іх колькасць пакуль не ўдакладняецца. Яшчэ падчас пошукаў следчыя атрымалі дадзеныя, на аснове якіх высунулі версію пра забойства.
Затрыманых дапыталі. Папярэдне можна казаць, што забілі жанчыну з мэтай крадзяжу. А каб схаваць сляды забойства, труп закапалі.
Аўтамабіль «Мазда» яны паспелі праз інтэрнэт прадаць у Расію.
Па словах Ганчаровай, следчыя ўжо ведаюць, дзе дакладна машына знаходзіцца.
Таццяна Слонімская 3 ліпеня каля 13:30 на сваім аўтамабілі паехала ў ягады і знікла. Яе партрэтамі абклеены ўвесь Мінск. Шукалі жанчыну і валанцёры, і міліцыя. Дзеці зніклай нават прапаноўвалі грошы за любую інфармацыю пра маму.
Крымінальную справу завялі за забойства з карыслівых меркаванняў. Гэты артыкул прадугледжвае пакаранне ў выглядзе пазбаўлення волі ад васьмі гадоў да пажыццёвага альбо смяротнае пакаранне.
