Нагодай для ліста сталі блізкія выбары ў мясцовыя саветы дэпутатаў.

Рэч у тым, што яшчэ падчас парламенцкай выбарчай кампаніі 2012 года спадар Солап меў намер зарэгістравацца кандыдатам па Слуцкай выбарчай акрузе. Дзеля гэтага ён правёў доўгую падрыхтоўчую працу, зарэгістраваў ініцыятыўную групу, сабраў неабходную колькасць подпісаў. Аднак Слуцкая акруговая камісія рэгістраваць Аляксандра Солапа ў якасці кандыдата адмовілася, прызнаўшы несапраўднымі 62 подпісы з 360 правераных. Паўторная ж праверка ЦВК выявіла, што з 62 подпісаў, прызнаных акруговай камісіяй несапраўднымі, такіх насамрэч толькі 9, і падставаў для адмовы спадару Солапу ў рэгістрацыі з гэтай прычыны няма.

Нягледзячы на адсутнасць юрыдычных падставаў, Цэнтрвыбаркам адмовіў Аляксандру Солапу ў рэгістрацыі ў якасці кандыдата «па маральна-этычных меркаваннях». Сакратар ЦВК Мікалай Лазавік заявіў тады ў прысутнасці журналістаў, што ён кожны дзень атрымліваў лісты з просьбамі «не рэгістраваць Солапа, таму што ён злачынец». Сам Аляксандр Солап ніколі не хаваў таго факту, што раней прыцягваўся да адказнасці. Аднак адбыццё адмеранага пакарання і адсутнасць правапарушэнняў пасля абумовілі пагашэнне судзімасці і, адпаведна, не маглі быць перашкодай для рэгістрацыі ў якасці кандыдата. Нават Слуцкая акруговая камісія не змагла «зачапіцца» за мінулае спадара Солапа, выпраўленае законам і ім самім.

У найбліжэйшых выбарах у мясцовыя саветы дэпутатаў Аляксандр Солап вырашыў зноў паўдзельнічаць у якасці кандыдата. Аднак пачынаць кампанію, на яго думку, магчыма толькі пасля вырашэння шэрагу пытанняў, якія ў сваім адкрытым лісце ён і адрасуе нязменнай кіраўніцы Цэнтрвыбаркаму Лідзіі Ярмошынай. У прыватнасці, спадар Солап цікавіцца, дзе ў заканадаўстве прапісаныя крытэры маральна-этычных прынцыпаў, якімі кіравалася ЦВК пры адмове ў рэгістрацыі яго кандыдатам у дэпутаты падчас парламенцкай кампаніі, і задае старшыні ЦВК наступныя пытанні: «Як бы больш падрабязна азнаёміцца з гэтымі маральна-этычнымі прынцыпамі, ці яны не пісаныя, а трактаваць і ўжываць іх — гэта вашае выключнае права? Як мне вызначыць, ці падыходжу я па вашых маральна-этычных прынцыпах для ўдзелу ў будучай выбарчай кампаніі ў якасці кандыдата ў мясцовыя дэпутаты, і калі не, то чаму?»

У адкрытым лісце актывіст «Гавары праўду!» нагадвае, што ў Беларусі на 100 тысяч чалавек насельніцтва прыпадае 440 зняволеных. У той жа час па колькасці асуджаных на 100 тысяч чалавек Беларусь займае другое месца ў Еўропе пасля Расіі. У 2012 годзе была асуджаная большасць кандыдатаў у прэзідэнты, а таксама іх паплечнікі па партыях, грамадскіх аб’яднаннях або грамадзянскіх кампаніях. Магчыма, для многіх з іх, а таксама ўсіх, хто калі-небудзь прыцягваўся да адказнасці, стаіць такое ж пытанне — ці варта ім пачынаць падрыхтоўку да выбарчай кампаніі і ці падыдуць яны па маральна-этычных прынцыпах нашага ЦВК? Таму свае пытанні Аляксандр Солап лічыць не прыватнай справай, а запытам тысяч грамадзян Беларусі.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру