У Магілёве 4 жніўня была затрымана21-гадовая ўдзельніца акцыі салідарнасці са зняволеным праваабаронцам Алесем Бяляцкім — студэнтка мясцовай ВНУ Дзіяна Буракова.
Затрыманне адбылося прыкладна ў 12.30 на вуліцы Першамайскай, каля цэнтральнага ўнівермага. Трое актывістаў праваабарончага руху, у тым ліку Дзіяна, раздавалі паштоўкі з інфармацыяй пра Бяляцкага, а таксама паштоўкі з ужо напісаным адрасам папраўчай калоніі № 2 Бабруйска, дзе адбывае пакаранне праваабаронца.
Супрацоўнікі міліцыі затрымалі толькі дзяўчыну — да двух іншых праваабаронцаў, мужчын, яны не падышлі, нягледзячы на тое што адзін з іх быў апрануты ў майку з партрэтам Бяляцкага. На думку назіральнікаў, гэта зроблена з мэтай запалохаць
Дзіяну адвезлі ў апорны пункт міліцыі па вуліцы Крыленкі.
Дзяўчына правяла ў міліцыі больш за дзве гадзіны. «Мяне пыталіся, хто мяне ў апазіцыю зацягнуў, — сказала яна. — Казалі, што гэта ўсё апазіцыйныя штучкі, што сэнсу ў гэтым няма. Склалі пратакол, што затрымалі мяне з дзевяццю паштоўкамі. Сказалі, што на наступным тыдні патэлефануюць».
Па словах Бураковай, супрацоўнікі міліцыі заявілі, што яна здзейсніла адміністрацыйнае правапарушэнне, якое нібыта выявілася ў раздачы паштовак «антыпалітычнага характару». «Адзін з міліцыянтаў сказаў: калі б вы хадзілі з паштоўкамі, дзе былі б намаляваныя інваліды, я б нават пайшоў у банк і паклаў грошы, а так вы лухту нейкую раздаеце, чаго вы лезеце ў палітыку?» — распавяла Дзіяна.
Яна перакананая ў тым, што не рабіла нічога супрацьпраўнага, і заяўляе, што запалохаць яе не ўдалося.«У міліцыі я была адна і адказвала на тыя пытанні, на якія лічыла патрэбным адказваць. Яны былі рознага характару, і размовы таксама ішлі на розныя тэмы.
Я не вялася на нейкія правакацыі, і запалохаць яны мяне не змаглі.Калі б мне зараз прапанавалі ісці з паштоўкамі таго чалавека, якога я падтрымліваю (у дадзеным выпадку Алеся Бяляцкага), то пайшла б і раздавала», — падкрэсліла дзяўчына.
