Камяк тлушчу вагой 15 тон знойдзены ў каналізацыі Лондана

«Камяк памерам з аўтобус» з харчовага тлушчу і вільготных сурвэтак сфармаваўся ў каналізацыі пад адной з вуліц у раёне Кінгстан-на-Тэмзе на паўднёвым захадзе Лондана, паведаміла кампанія Thames Water, якая аказвае паслугі па водазабяспечанні ў брытанскай сталіцы.

Засор выявілі пасля таго, як жыхары суседніх дамоў паскардзіліся, што не могуць змыць ваду ў прыбіральнях.

Калі б засор не знайшлі, вада з каналізацыі магла б затапіць дамы і вуліцы

«Улічваючы, што ў нашым падпарадкаванні знаходзяцца найбуйнейшыя каналізацыйныя трубы і што гэта найбуйнейшы „айсберг тлушчу“, які мы калі-небудзь сустракалі, мы мяркуем, што ён павінен быць самым буйным у брытанскай гісторыі», — заявіў прадстаўнік Thames Water Гордан Хэйлвуд.

«Нам даводзілася здабываць і больш тлушчу з-пад цэнтральнага Лондана, але мы ніколі не бачылі ў трубах засору з такога вялікага суцэльнага згустку тлушчу», — падкрэсліў ён.

«Каналізацыя была амаль цалкам забітая больш чым 15 тонамі тлушчу. Калі б мы не знайшлі гэтага своечасова, неачышчаныя сцёкавыя воды пачалі б вырывацца вонкі праз каналізацыйныя люкі ва ўсім Кінгстане-на-Тэмзе», — дадаў Хэйлвуд.

Паводле яго словаў, кавалак тлушчу быў настолькі вялікім, што ён пашкодзіў трубы, і на іх рамонт пойдзе да шасці тыдняў.

Як паказалі камеры назірання, прапускная здольнасць каналізацыі ў месцы засору скарацілася да 5%.

bbc.co.uk

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм