Будматэрыялы для «Чыжоўкі-Арэны» пайшлі на будаўніцтва катэджаў чыноўнікаў 8

Аператыўнікі службы па барацьбе з эканамічнымі злачынствамі ГУУС Мінгарвыканкама выкрылі злачынную групу, якая складаецца з кіраўнікоў і работнікаў ААТ «Мінкпрамбуд» і КУП «УКБ Мінгарвыканкама», якія на працягу года ўчынялі крадзеж будаўнічых матэрыялаў з аб’екта «Культурна-забаўляльны спартыўны комплекс у жылым раёне Чыжоўка г. Мінска».

Як паведаміла старшы оперупаўнаважаны па асабліва важных справах ГУБЭЗ МУС Вераніка Пасмеццева, падчас аператыўна-вышуковых мерапрыемстваў аператыўнікі службы БЭЗ сталіцы ўстанавілі, што з лістапада 2012 года па ліпень 2013 года група падазроных службовых асоб па папярэдняй змове, дзейнічаючы з карыслівай зацікаўленасці і з выкарыстаннем сваіх службовых паўнамоцтваў, завалодалі будаўнічымі матэрыяламі прадпрыемства ААТ «Мінкскпрамбуд» амаль на 30 млн. рублёў.

Арматура, цэгла, пясок, цэмент, мяккія дахавыя матэрыялы, тынкоўка, піламатэрыялы прызначаліся для выканання будаўніча-мантажных работ на аб’екце «Чыжоўка Арэна».

Аднак будаўнічыя матэрыялы сістэматычна выкрадаліся і вывозіліся ў вёску Загор’е Смалявіцкага раёна, пасёлак Азярцо і вёску Тарасава Мінскага раёна, дзе выкарыстоўваліся пры будаўніцтве прыватных жылых дамоў (катэджаў) падазроных — кіраўнікоў.

Цяпер упраўленнем Следчага камітэта па Мінску ў дачыненні да чацвярых падазроных распачата справа на падставе ч. 3 арт. 210 КК (крадзеж шляхам злоўжывання службовымі паўнамоцтвамі, учыненае ў буйным памеры). Яны затрыманыя.

Следства і аператыўнікі БЭЗ устанаўліваюць кола асоб, якія аказвалі садзейнічанне ў злоўжываннях і крадзяжы будаўнічых матэрыялаў з аднаго з галоўных спартыўных аб’ектаў краіны, які будуецца, а таксама канчатковую суму нанесенага ўрону бюджэту дзяржавы.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ