Планы Украіны падпісаць пагадненне аб асацыяцыі з ЕС не павінны негатыўна адбіцца на аб'ёмах гандлю з Беларуссю.
Пра гэта ішла размова на сустрэчы Аляксандра Лукашэнкі з Міхаілам Мясніковічам, паведамляе БЕЛТА.
Адной з тэм сустрэчы было развіццё гандлёва-эканамічных сувязяў з Украінай і афіцыйны візіт у Беларусь прэм'ер-міністра гэтай краіны Мікалая Азарава, які адбудзецца 7—8 кастрычніка.
Паводле слоў Міхаіла Мясніковіча, планы Украіны падпісаць пагадненне аб асацыяцыі з Еўрапейскім саюзам не павінны негатыўна адбіцца на аб'ёмах гандлю з Беларуссю:
«У гэтай сітуацыі Беларусь ні ў якім разе не павінна страціць гандаль з Украінай, а можа быць, нават знайсці пэўныя плюсы. У нас там вельмі вялікі рынак».
Разам з тым прэм'ер-міністр лічыць, што ў пытанні ўдзелу Украіны ў працэсах еўразійскай інтэграцыі не варта прытрымлівацца выбарачнага падыходу.
«Украіна сёння заяўляе пра гатоўнасць прыняць каля сямідзесяці са ста з лішнім пагадненняў, якія ў нас ёсць у Мытным саюзе.
Безумоўна, трэба ўсё ж такі імкнуцца да таго, каб гэта было паўнавартаснае сяброўства», — заявіў Міхаіл Мясніковіч.
