Сусветны банк прагназуе рост ВУП Беларусі на 1% у 2013 годзе і на 1,5% — у 2014 годзе. Такія ацэнкі прыводзяцца ў эканамічным аглядзе СБ, прэзентацыя якога адбылася сёння ў Мінску.
«Рост ВУП знізіўся пад уздзеяннем знешніх і ўнутраных фактараў. У эканамічным аглядзе мы прадугледжваем, што рост ВУП у Беларусі сёлета складзе 1%, у 2014-м — 1,5%», — адзначыў падчас прэзентацыі агляду дырэктар Сусветнага банка па Беларусі, Украіне і Малдове Чымяа Фан.
Паводле меркавання аўтараў агляду, знешнія ўмовы, уключаючы абавязацельствы Беларусі перад Антыкрызісным фондам ЕўрАзЭС, «вымусяць прытрымлівацца палітыкі абмежавання ўнутранага попыту ў чацвёртым квартале 2013 года і на працягу 2014 года». Як вынік, тэмпы эканамічнага росту ў Беларусі будуць нізкімі, чакаюць эканамісты Сусветнага банка.
«Беларусь увайшла ў перыяд нізкіх тэмпаў эканамічнага росту. І той высокі рост ВУП, які назіраўся да 2008 года, наўрад ці магчымы ў цяперашняй сітуацыі», — заявіў падчас прэзентацыі агляду старшы эканаміст Сусветнага банка Себасцьян Экард.
Аўтары эканамічнага агляду нагадваюць, што ў студзені—верасні 2013 года рост ВУП у Беларусі склаў 1,1% (уладамі ўстаноўлены гадавы прагноз росту ВУП на ўзроўні 8,5%). Нізкія тэмпы росту, лічаць эксперты, былі абумоўлены зніжэннем аб'ёмаў прамысловай вытворчасці і знешняга попыту на беларускую прадукцыю.
«Падзенне чыстага экспарту, якое адбывалася хуткімі тэмпамі ўжо ў першым квартале, у другім квартале паскорылася ў выніку запаволення росту ў Расійскай Федэрацыі і зніжэння экспартных цэн на калійныя ўгнаенні з-за распаду картэля паміж «Беларуськаліем» і «Уралкаліем», — канстатуюць эксперты ВБ.
Нягледзячы на запаволенне тэмпаў эканамічнага росту ў Беларусі, аналітыкі банка мяркуюць, што «інфляцыя застанецца на ўзроўні больш як 15% (на канец перыяду), за кошт запланаванага павышэння тарыфаў на камунальныя паслугі і паслаблення намінальнага абменнага курсу».
Аўтары эканамічнага агляду прагназуюць, што ў наступныя гады інфляцыя ў Беларусі будзе заставацца на досыць высокім узроўні. Паводле ацэнак Сусветнага банка, інфляцыя ў 2014 годзе складзе 15,2%, у 2015-м — 16,2%.
Пры гэтым эксперты чакаюць невялікія тэмпы росту ВУП Беларусі ў найбліжэйшыя гады. «Мы чакаем, што ў сярэднетэрміновай перспектыве тэмпы эканамічнага росту застануцца ўмеранымі, з прычыны нязначнага аднаўлення знешняга попыту (з улікам росту эканомікі РФ і ЕС) і ўнутранага попыту (пры правядзенні мякчэйшай макраэканамічнай палітыкі ў 2015 годзе, які з'яўляецца годам выбараў)», — гаворыцца ў эканамічным аглядзе.
Паводле прагнозу Сусветнага банка, рост ВУП Беларусі ў 2015 годзе можа скласці 2%.
