Майдан — гэта штосьці большае, чым супрацьстаянне апазіцыі і ўлады. Майдан — гэта штосьці больш, чым сутыкненне ўсходняй і заходняй думкі. Майдан — гэта нават не поле барацьбы розных ідэалогій, а тым больш не тая сфера, на якой не могуць падзяліць свае ўплывы Еўразвяз і Расія. Майдан — гэта той рубікон, да якога ў сваім жыцці даходзіць чалавек з думкай і перакананнем, што, каб застацца Чалавекам, трэба меняць жыццё, грамадства, краіну.
Трэба, бо калі не задумацца аб гэтым зараз, можна згубіць галоўнае, што мае чалавек — сваю людскую годнасць. І тут два варыянты. Можна жыць як набяжыць, нічога не меняць і паціху дэградаваць. А можна ўсё ж такі зарызакаваць і пайсці наперад. Туды, дзе няма ўпэўненасці, але ёсць надзея на перамены да лепшага, больш годнага, справядлівага і свабоднага жыцця.
