Дацкія вучоныя прыйшлі да высновы, што жанчыны, якія ўмерана ўжываюць алкаголь у час цяжарнасці, нараджаюць больш прыстасаваных да жыцця дзяцей.
У ходзе даследаванняў, праведзеных псіхолагамі з Капенгагенскага ўніверсітэта з 1996 па 2002 гады, 100 тысяч цяжарных жанчын былі апытаны на прадмет іх стаўлення да алкаголю. Праз сем гадоў псіхолагі правялі псіхалагічныя тэсты з 37 тысячамі дзяцей апытаных раней жанчын.
Вынікі даследаванняў паказалі, што дзеці, маці якіх за час цяжарнасці дазвалялі сабе пару бакалаў віна ў тыдзень, лепш прыстасаваны да жыцця. Такія дзеці вызначаюцца больш сталымі паводзінамі, у іх лягчэй складваюцца адносіны з равеснікамі, чым у дзяцей, маці якіх поўнасцю ўстрымліваліся ад алкаголю.
Аднак вучоныя, якія праводзілі даследаванні, папярэдзілі, што не разглядалі выпадкі, калі цяжарныя жанчыны ўжывалі алкаголь у вялікай колькасці. Таксама псіхолагі падкрэслілі, што трэба ўлічваць такія ўскосныя фактары, як добрая адукацыя, моцнае здароўе і актыўны лад жыцця жанчын, якія ўмерана ўжывалі алкаголь.
