Аляксандар Лукашэнка сёньня выступіць перад групай расейскіх рэгіянальных журналістаў. Гэтыя сустрэчы маюць эканамічнае значэньне: дэманстрацыя любові да Расеі настройвае расейскую грамадзкую думку супраць павышэньня цэнаў на газ для Беларусі. Камэнтар Рэдакцыі.
Тысячы трацяцца, каб ашчадзіць мільёны. Інвэстыцыі ў шыкоўны прыём соцень расейскіх рэгіянальных журналістаў акупляюцца цаною зьніжэньня расцэнак на газ на 5 ці 10 даляраў за кубамэтар.
Але як падлічыць згубны для беларускай сьвядомасьці, для нацыянальнай самапавагі эфэкт гэтых клятваў у адданасьці, гэтага рэфрэну «мы адзін народ» (чаму ж тады не падзяліцца нафтазаводамі і дзяржаўнасьцю, калі мы адзін народ?), гэтага, назавём рэчы сваімі імёнамі, пластаваньня перад Расеяй? Заклінаньні вечнага сяброўства абарочваюцца ўрэшце вечным ланцугом, маральным і матэрыяльным. Трацім тысячы, выйграем мільёны, а сплачваем пасьля мільярды.
* * *
Гэта пяты прыезд у краіну прадстаўнічай дэлегацыі расейскіх журналістаў. На гэты прэсавы тур зьехаліся каля 70 журналістаў з амаль 40 рэгіёнаў Расеі. Дзе-хто зь іх браў удзел і ў ранейшых такіх паездках.
Журналісты жылі ў найлепшых гатэлях сталіцы і наведалі прадпрыемствы "Белатміт", "Белшына", бровар "Сябар", гуту "Ялізава", Вайсковую акадэмію Беларусі, лыжны цэнтар "Сілічы".
Прэс-канфэрэнцыя А. Лукашэнкі будзе трансьлявацца ў жывым эфіры Першага каналу радыё ад 12-й гадзіны. Папярэднія такія сустрэчы былі нагодай для гучных заяваў і прапаганды.
