Спіс рэкамендацый утрымлівае 19 пунктаў. Сярод іх патрабаванне забяспечыць наяўнасць Wi-Fi, адзінай формы вопраткі з бэйджамі для абслугоўчага персаналу, схем руху транспарту, веданне персаналам размоўнай англійскай мовы і прадухіліць нематываваны рост цэнаў.
Таксама было распрацаванае меню з 10 страў беларускай нацыянальнай кухні.
На думку прадстаўнікоў падкамісіі неабходны мінімум складаецца з асарці сялянскага, селядзца па-старабеларуску, грыбной поліўкі, дранікаў, бульбянікаў, пячыста з свініны, верашчакі, грачанікаў з грыбамі, беларускага чаю і збіценю.
Гісторык, аўтар і ўкладальнік кнігі «Наша страва» Алесь Белы знаходзіць такі спіс вельмі нудным.
«Свініна, бульба і грыбы. Усё гэта ўзята з постсталінскага кулінарнага зборніка 1955 года,
якому споўнілася 59 гадоў. Добры паказчык менталітэту беларускага чынавенства, — кажа Белы. — Таксама незразумела, ці павінныя ўсе рэстараны мець гэты спіс, у тым ліку японскай, італьянскай і г.д? Гэта было б абсурдна».
У Міністрстве гандлю патлумачылі, што прадстаўлены на сайце спіс з'яўляецца наборам рэкамендацый, за невыкананне якіх караць нікога не збіраюцца.
«Аднак напярэдадні ЧС-2014 па хакеі кожная ўстанова, якая паважае сябе, мусіць прытрымлівацца дадзеных рэкамендацый. Бо
часам бывае, што адкрыецца нейкіе кафэ, глядзіш — прыгожа. А праходзіць некалькі месяцаў, і месца ператвараецца ў гадзючнік.
Пагадзіцеся, вам не будзе хацецца наведваць ерундовую ўстанову, якая не робіць рамонт, не абнаўляе інтэр'еры.
Зразумела, што ў інтарэсах суб'ектаў грамадскага харчавання стварыць камфортныя ўмовы для турыстаў, гасцей ЧС па хакеі. Але чаму толькі для турыстаў? Усё перш-наперш робіцца для нашых людзей. Таму Міністрства гандлю пільна сочыць за гатоўнасцю грамадскага харчавання. Падкамісія мінгандлю на чале з міністрам гандлю пастаянна разглядае сур'ёзныя пытанні. На адным з апошніх, напрыклад, абмяркоўвалася арганізацыя грамадскага харчавання на вакзалах і ў нацыянальным аэрапорце Мінск», — паведаміў прэс-сакратар Міністэрства гандлю Дзмітры Маліноўскі.
